COA GIISNAB
Sa unang unom lang ka buwan ning tuiga, niabot og P4,186,300 ang nagasto sa Cebu State College of Science and Technology (CSCST) pagbayad sa makabungog nga honorarium ngadto sa mapahimuslanong mga opisyal sa eskuylahan nga gipangulohan sa presidente nga si Jose Sal Tan. Kon unsa kadako ang kantidad nga nakapaburot sa mga bolsa sa mga opisyal, nga gipasanginlang wa kaserbisyo bisan gamay sa kabos nga mga tinun-an nga maoy tinubdan sa kuwarta, mao sab kadako ang pondo nga nahikaw gikan sa batakang mga panginahanglan sa CSCST pagtanyag og de kalidad nga edukasyon.
Ang makauuwaw nga pahimus nilang Tan ug kaubanan niresulta sa dakong eskandalo sa CSCST. Samtang nagdawat si Tan og hangtod sa P125,000 nga honorarium kada buwan, hapit kalima pil-a ang iyang binuwang suholan pagka presidente nga P27,000, way chalk ni lingkoranan ang classrooms, way tubig ang mga pansayan ug nagtulo ang atop sa CSCST. Nakapait kay bisan gibadlong nang mga opisyal sa sa Commission on Audit (COA), padayon silang nagpabaga pagkolekta sa kuwarta nga, ubos sa balaod, di unta nila angayng hilabtan.
-o0o-
Ang Audit Observation Memorandum No. 2005-02 nga pinetsahan og Septiyembre 15, 2005 nideklarar sa papating nilang Tan ug kaubanan nga klarong kalapasan sa balaod. Gipasikaran sa COA ang Budget Circular No. 2003-05 nga giluwatan sa Department of Budget and Management (DBM) niadtong Septiyembre 26, 2003.
Gawas sa paghunong sa pagdawat sa makabungog nga honorarium, ang COA nimando sab nilang Tan ug kaubanan pag-uli sa kinatibuk-ang honorarium nga ilang nadawat gikan sa Enero hangtod sa Hunyo ning tuiga. Pero inay motuman sa COA ug mangayo og pasaylo sa ilang kalapasan, silang Tan ug kaubanan nagpaugat pagkuwestiyon sa balaod nga way pupanagan nilang giyatakan.
Ambot nagtoo ba kaha nga di sila madutlan sa COA, o masaligon nga malukmay rang state auditors sa CSCST nga giingong gibuhong sa mga pabor ug makabuhong nga mga pribilihiyo, sama sa cellular phones, teaching loads ug transportation allowance.
-o0o-
Maayo na lang kay gidasonan sa Visayas Ombudsman ang sugo sa COA. Silang Deputy Ombudsman Primo Miro ug Ombudsman Visayas Director Virginia Palanca-Santiago, nga maoy nangunay pag-imbestigar sa kontrobersiya sa CSCST, naningil na nilang Tan ug kaubanan gihunong na bang makabungog nga honorarium ug giuli na bang kuwarta nga ilegal nilang nakolekta.
Atong atangan unsay itubag nilang Tan ug kaubanan sa Ombudsman. Bugalbugal ba sama sa ilang gihimo ngadto sa nagpakabanang mga kawani, mga magtutudlo ug mga tinun-an, isnabon ba lang sama sa ilang gihimo ngadto sa mga sakop sa media, o kunsaran na sa kataposan sa Espiritu Santo ang itom nilang mga kasingkasing ug hingpit nang maghinulsol sa lang-og nilang mga kasal-anan? [30] leo_lastimosa@abs-cbn.com
