GUGMA UG PASALAMAT
Kon sa kataposan matuman nang mga pasalig sa nagkalainlaing ahensiya sa gobyerno, masulbad nang problema sa senior citizens sa paghikaw gikan nila di lang sa diskuwento sa plitehan ug tambal kon dili hasta, ug labi na, sa batakang pagtahud sa kaliwatan nga gitabangan nila pag-umol. Ang mga pasalig giluwatan atol sa tinuig nga kongreso nga gipasiugdahan karong tuiga sa Office of Senior Citizens Affairs (OSCA) ni Cebu City Councilor Rodrigo gihimo sa kontrobersiyal nga South Reclamation Project (SRP) sa Syudad sa Sugbo niadtong Sabado.
Gikumot ang akong kasingkasing nga nagtan-aw sa mga tawo nga maoy tinuod nga nautangan sa atong karon: Kinahanglan pa silang mobarug sa luya na intawon nilang mga lutahan aron pag-awhag sa mga butang nga ila na untang daan: Way kinutobang paghigugma ug pasalamat sa katilingban nga mao karoy nakasawo ug nakapahimus sa ilang mga hinagoan.
-o0o-
Sakto si Naty Montecillo, retiradong employment officer sa Department of Labor and Employment (Dole 7), usa sa mga nitambong sa kongreso, kinahanglang ilusad ang lapad nga kampanya, nga sustinido ug di tokar-tokar lang, pagpahibawo sa tanang hingtungdan, di lang sa mga drayber, transport operators ug mga botika, sa mga katungod ug mga benepisyo sa senior citizens. Kining maong tahas di mahimong itugyan lang ngadto sa OSCA o sa ubang mga ahensiya sa gobyerno. Wa pa mahuman ang trabaho sa senior citizens—kinahanglan pa nilang edukahon ang mga nagsunod nila sa mga mithi sa kaangayan ug utang kabubut-on.
Ang senior citizens wa pa hingpit nga nangalawos. Ang kahinog sa ilang pangedaron ug kaabunda sa kasinatian nakahimo nilang takos nga mga tinubdan sa kasayuran unsaon pagsulbad ang nagbuntaog nga mga suliran karon—nga kasagaran nasugatan na nila niadto, kay kasagaran nato nangasaag na sa atong padulngan tungod sa kapakyas paglingi sa atong gigikanan. Bisan napakyas sab pagsulbad sa mga gumonhap sa ilang panahon, ang katiguwangan mahimong mas makasabot na sa kahimtang sa nasud ug sa katawhan karong wa na sila magapos sa palas-unon sa naandang inadlaw-adlaw nga mga gimbuhaton.
-o0o-
Si Cebu City Mayor Tomas Osmena nipahibawo sa senior citizens sa talagsaon niyang plano para nila: Paghimo sa ilang building (nga gisugdan na pagtukod) nga morang salin sa karaang simbahan nga nahugno tungod sa kusog nga linog sa panahon ni Dr. Jose Rizal ug paghimo sa gitukorang luna daplin sa dagat nga labing nindot nga himoanan sa kasal sa tibuok kalibotan. Nagpahiyom nga nisugo ang mayor nga di una sila mamatay samtang wa pa mahuman ang proyekto.
Labaw sa mga tigbayon ug materyal nga mga handumanan mao ang pagpatigbabaw sa mas malungtarung kabilin sa katiguwangan—pagpatuman sa balaod bisan kinsay hingtungdan, bisan kinsay maig-an. [30] leo_lastimosa@abs-cbn.com
