SUKNA NI ENTENG
Si Vicente "Enteng" Romano III, ang utok sa eLagda.com, maoy usa sa responsable sa pagpalihok sa mga Pilipinhon nga naabot sa emails, fax ug text messaging batok sa kurakot nga administrasyon ni kanhi presidente Joseph Estrada. Nisuway sab siya apan napakyas pagkumbinser pinaagi sa cyberspace ni Chief Justice Hilario Davide Jr. pagdagan pagka presidente sa kontrobersiyal nga eleksiyon sa niaging tuig. Karong bag-o, gipasiugdahan niya ang nasudnong kampanya pagpangaliya para sa nasud pinaagi sa healourland.com.
Way makalalis sa pagpakabana ni Enteng para sa nasud ug sa katawhan. Maong wa ko makugang pagkadawat sa iyang email nga nipadayag og kahibung sa kahilom sa mga grupo sa Edsa 1 ug 2 atubangan sa eskandalo sa audio recording ni Presidente Gloria Macapagal-Arroyo. Tuguting akong kutluon dinhi ang kabahin sa iyang sinuwat:
"Karon, dunay mga tilimad-on sa pagpangawat nga lahi sa panahon ni Erap. Si Gloria wa pasanginli nga nangawat sa nasudnong panudlanan; pero dunay mga pasangil nga nangawat siya og mga balita ug gihikawan ang katawhan sa lider nga ilang gipili, bisan pag gisupak sa pipila ka sektor ang maong lehitimong lider.
"Pero wa tay nakita nga kasuko, bisan pagpakaaron-ingnon na lang sa kahimangod, sa mga grupo nga nibarug para sa katarung sa Edsa 1 ug 2.
"Ngano man?
"Pipila ka tawo niingon nga tungod ni sa "people-power fatigue." Duha ka kausaban sa gobyerno igo lang nibalhin sa liderato sa gobyerno gikan sa usa ka politikanhong kampo ngadto sa lain. Way nahitabo nga matinud-anong kausaban. Ug ang pagpalagpot ni Gloria mahimo lang makapabalik sa gahom sa mga puwersa nilang Erap ug Marcos.
"Para nako ang mas maayong katin-awan mao ang atong kahadlok sa lideratong way katakos. Atol sa eleksiyon, nilingiw ta sa pag-abuso ni Gloria sa kuwarta sa gobyerno kay:
"Gamay ra tong atraso nga gikinahanglan aron maluwas ta gikan sa makahahadlok nga pamunoan ni FPJ.
"Karon, atong gihapin ang samang katin-awan ngadto sa atong sitwasyon: Gamay rang iyang sipyat ug ato na lang kalimtan, kay mas kahadlokan ang pagpuli sa way nakamaohan nga si Noli de Castro.
"Gawas pa, si Gloria ang labing maayong presidente nga maangkon sa nasud. Way bisan usa sa oposisyon o sa administrasyon nga makaambas sa iyang katakos, edukasyon ug mga programa.
"Pero kinahanglang natong tubagon ang mosunod nga mga pangutana:
Ø Kalimtan na ba lang ang pagpanikas?
Ø Kay di na kapamatud-an sa korte?
Ø Kay di makaapektar sa resulta sa eleksiyon?
Ø Tungod ba lang kay way ikapuli ni Gloria, di na lang ta molihok?
Ø Mopadaplin na ba lang ta og pasagdan ang oposisyon nga mopatuman sa ilang gusto?
Ø Tungod ba lang kay nanikas hastang oposisyon, mas humot nang pagpanikas kay sa jueteng scandal ni Erap?" [30] leo_lastimosa@abs-cbn.com
