Arangkada for June 1, 2005

WALDAS SA AFP

Kaingon ba nakog nagkinto nang kadagkoan sa AFP human gibisto sa mga
rebeldeng sundawo ang lapad nga anomaliya sa militar atol sa Oakwood mutiny
duha ka tuig nang nilabay. Mahimong wa gyod silay kaikog o di na gyod
katambalan ang kagaw sa ilang pangurakot.
Ang pagkabisto sa pagtukod sa luho nga beach houses sa AFP sa Boracay
nisunod sa eskandaluso sang multi-milyones pesos nga renovation sa sidewalk
sa Kampo Aguinaldo, ang headquarters sa AFP. Kon nagsugwak pang kuwarta sa
AFP, wa untay moreklamo.
Pero lisod dawaton nga giuna ang mga kapritso sa mga heneral nga wa pa man
gani kahatag sa labing batakang mga panginahanglan sa ordinaryong
kasundalohan.
-o0o-
Nagpadayon ang pait nga kahimtang ug grabeng katimawa sa kinabag-an sa
kasundalohan nga nakaaghat sa mga rebeldeng sundawo pagsakmit sa Oakwood sa
Makati:
 Kanunay lang gihapong mauwahi ang ilang rice subsidy;
 Wa gihapoy igong kuwarta pagpaayo sa depektuso nilang mga armas ug
sa pagpamalit og igong mga bala;
 Nagpabiling substandard ang boots, labi na para sa mga sundawo nga
nadestino sa natad sa panggubatan sa Mindanao;
 Padayong napasagdan ang labing batakang mga panginahanglan sa ilang
mga sakop sa pamilya, apil nang pagpa-eskuyla sa ilang mga bata ug
pagpa-ospital sa ilang mga masakiton; ug
 Samtang naghayang-hayang na sa mga palasyo ang dagkong mga opisyal,
nagpabiling saad hangtod karon ang housing program para sa kinabag-an sa
kasundalohan.
-o0o-
Si Lt. Gen. Emmanuel Teodosio, ang hepe sa Central Command nga nia magbase
sa Sugbo, mao diay ang utok sa pagtukod sa usa ka swimming pool ug tulo ka
buildings sa Boracay: Duha ka tulo ka andana nga buildings nga dunay 30 ka
air-conditioned nga mga kuwarto ug usa ka buwag nga rest house para sa mga
opisyal.
Kataw-anan ang iyang pasalig nga ang proyekto gitumong sa pagpalambo sa
morale sa kasundalohan pinaagi sa paghatag nilag world-class nga luna nga
kapahuwayan. Unsaon man intawon pagpahimus sa ordinaryong mga sundawo nga
wa man gani intawon silay ikaplite padung sa Boracay?
Iya ba gyod ning binuang o igo lang gipagtigbabaw ni Teodosio ang trademark
sa administrasyon ni AFP Chief Efren Abu nga mao ang pagwaldas-waldas?
-o0o-
Angayng imbestigahon ang pangangkon ni Teodosio nga ang minilyon ka pesos
nga gigasto sa proyekto hinatag sa mga negosyante nga sakop sa Kaibigan ng
mga Kawal sa Kaduluan (KKK). Kinsa man ning mga negosyanteha? Sakto ang
mga sakop sa Kongreso, lisod toohan nga way bugti ang ilang kamanggihatagon
ngadto ni Teodosio ug sa AFP.
Maka-garantiya ba si Teodosio nga wa sila mahilabigit sa smuggling ug ubang
ilegal nga kalihokan? Makapsalig ba siya nga ang hinabang nga kuwarta dili
panagang daan aron pagsegurong molingiw ang kasundalohan sa ilang
kriminalidad? [30]

Email: leo_lastimosa@abs-cbn.com

_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/