Arangkada for May 19, 2005

ASOY SA LAKTAW II

Usa ka buwan human sa pag-asumir ni Gobernador Gwen Garcia sa Kapitolyo,
gibalhin ngadto sa Danao City ang team leader sa COA nga nibadlong ni kanhi
gobernador Pablo Garcia sa paglaktaw sa Sangguniang Panlalawigan (SP) sa mga
kontrata nga iyang gipirmahan. Niadtong Agosto 13, 2004, tulo ka buwan
human niya pasidan-i si Pablo nga nakalapas sa balaod, si Nancy Aparri
gipulihan ni Josette Rodriguez, kanhi auditor sa Danao.
Gipasabot ni Rodriguez nga normal ang ilang binayloay sa puwesto ni Aparri.
Kay lima na siya ka tuig sa Danao, lapas sa naandang tulo ka tuig nga
termino. Pero si Aparri duha pa ka tuig nga team leader sa Kapitolyo.
Kadudahan ang timing kay nagpadayon pa siya pagsusi sa iyang gitoohang
pagpanglaktod sa mga transaksiyon sa Kapitolyo.
Labawng kadudahan kay, bisan sa legal opinion ni COA Regional Legal and
Adjudication Director Roy Ursal nga wa ma-repeal sa Government Procurement
Reform Act (GPRA) ang Section 22, paragraph C sa Local Government Code
(LGC), way ek bisan gamay ang COA sa legalidad sa mga transaksiyon nga
gibaraw ni Aparri usa na ka tuig ang nilabay.
-o0o-
Si Rodriguez nitug-an sa DYAB Abante Bisaya nga nahuman nang iyang post
audit sa mga transaksiyon sa Kapitolyo sa 2004, nga ang unang tunga iya ni
Pablo ug ang ikaduhang tunga kang Gwen. Gipaabot niyang aksiyonan na sa COA
Visayas ang iyang mga rekomendasyon sunod buwan.
Bisan klarong nanagana, gibisto ni Rodriguez nga nagpadayon si Gwen sa
nasugdan sa iyang amahan nga paglaktaw sa SP sa iyang gipirmahang mga
kontrata. Sama ni Aparri, iya sang gipadad-an og suwat si Gwen ug
gipahinumdoman nga nakalapas siya sa balaod. Pero igo lang siyang gitubag
ni Gwen nga napapas nang balaod nga iyang gihisgutan.
Di kasulti si Rodriguez sa tukmang numero pero nakaseguro
siya nga sobra sa katunga sa mga kontratang gisudlan sa Kapitolyo sa tibuok
2004 nga way pagtugot sa SP. Di sab siya mosulti kon iya bang girekomendar
nga i-disallow ang laktod nga mga transaksiyon.
-o0o-
Ang dul-an sa usa ka tuig nga pagpakahilom sa COA labot sa kontrobersiya
gibuak ni Cebu Provincial Board Member Luigi Quisumbing. Pero di COA ang
ni-alerto niya kon dili ang upisina sa gobernador. Ang supplemental budget
No. 1 nga gisumiter sa gobernador ngadto sa SP niadtong Abril 4 maoy
nakapahibawo ni Quisumbing nga dugay ra diay silang gilaktawan.
Pero nihit kaayong mga dokumento nga magamit sa ilang pakisusi. Mismong
kopya sa mga kontrata sa security ug janitorial services puwerteng dugayang
gihatag. Maong nahadlok ang board members nga nikiha sa gobernador sa
Ombudsman nga, kon di masuspenso si Gwen, maniobrahon ang mga dokumento aron
kalutsan ang giisip nilang kalapasan sa balaod.
(Ugma: Kalibog sa GPRA.) [30] Email: leo_lastimosa@abs-cbn.com

_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/