Arangkada for May 20, 2005

HANAP BANG GPRA?

Wa gyod untay dag-anan si Cebu Provincial Board Member Luigi Quisumbing ni
Capitol Legal Consultant Pablo John Garcia. Si Garcia, nga topnotcher sa
bar examination, dunay tanang katungod pagkuwestiyon sa kasuhito sa balaod
ni Quisumbing nga, ug may katungod sab si Garcia nga kanunay ning
balikbalikon, mao pay pagsugod og eskuyla sa abogasiya.
Maong kon lalis lang sa balaod ang hisgutan, klarong kuniskunison unta ni
Garcia si Quisumbing. Unta.
Kay ning nagbaga nilang engkuwentro, klarong mas suhito si Quisumbing sa
gilalisan nga mga probisyon sa Local Government Code (LGC) ug sa Government
Procurement Reform Act (GPRA).
-o0o-
Ang kalig-on sa mga argumento ni Quisumbing nanukad sa ilang kayano ug
kamakanunayon:
 Nga wa magkasungi ang Section 22, paragraph C, sa
LGC ug ang GPRA ug busa wa ni mausab ni mapapas sa mas bag-ong balaod;
 Nga ang pagsubasta sa security ug janitorial
services nahimo niadto pang Oktubre, tulo ka buwan sa wa pa aprobahi ang
2005 budget sa Sugbo niadtong Enero; ug
 Nga ang subasta sa security services nga balor og P6
milyones niadtong Oktubre di mahimong ipasikad sa reenacted nga 2003 budget
nga nigahin lag P3 milyones.
Ug bisan di pa abogado si Quisumbing, nitakdo ang iyang
mga argumento sa baruganan di lang sa mga sakop sa SP nga abogado kon dili
hastang may direktang papel pagpatuman sa GPRA�silang COA Regional Legal and
Adjudication Director Roy Ursal ug Bryan Begabal sa Procurement Policy Board
(PPB).
-o0o-
Sa pikas nga bahin, ang mga argumento ni Pablo John naklarong huyang bisan
sa abundang gisagolan og mabulukong mga insulto tungod sa ilang
kamausab-usabon:
 Una, niinsistir siya nga napapas nang Section 22,
paragraph C, sa LGC sa GPRA;
 Ikaduha, bisan wa pa ma-repeal ang Section 22, dunay
laing mga probisyon sa LGC (iyang maguwang nga si Gwen nihisgot sa sections
306 ug 346) nga nagtugot sa gobernador paglaktaw sa SP; ug
 Ikatulo, gihimong subasta niadtong Oktubre aron di
maputol ang security ug janitorial services sa Kapitolyo (kini human
napamatud-an ni Quisumbing nga wa katuman ang subasta sa panginahanglan sa
aprobadong budget, nga usa sa mga panginahanglan ubos sa GPRA).
-o0o-
Gipasabot ko sa duha ka nagsunod nga mga gobernador, si Gwen ug iyang
amahang si Pablo, nga gilaktawan nilang SP bisan wa pa masegurong legalidad
sa ilang hubad sa GPRA kay kinahanglan silang motuman sa trabaho pinasikad
sa ilang gitoohang husto inay magpagapos sa pagsige og pangonsulta sa
Department of Justice (DOJ).
Kon mao, nganong mora mang gisilian ang mga Garcia dihang nasakpan ni
Quisumbing ang ilang mga transaksiyon? Nganong hangtod karon wa pa man
moboluntaryo pagtug-an sa mga transaksiyon nga ilang gisudlan nga way
pagtugot sa SP? [30]

Email: leo_lastimosa@abs-cbn.com

_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/