Arangkada for May 26, 2005

ENTRANCE EXAM

Naalarma ang mga ginikanan sa pahibawo ni Cebu City Schools Division
Superintendent Leonilo Oliva nga pakuhaon nag entrance examination ang mga
bata nga magpa-enroll sa Grade One para sa tuig tingtungha 2005-2006. Labi
na tungod sa pagpasabot ni Dr. Oliva nga mas dako ang kahigayonan sa mga
bata nga makapasar sa pasulit kon maka-eskuyla sila sa kindergarten.
Nagduda ang mga ginikanan nga ang entrance examination gitumong aron
mapugos sila sa pagpa-eskuyla sa ilang mga bata sa kindergarten. Ang
nakapait kay mayoriya nila di kaabot sa bayranan (labing menos P400 ang
matrikula ug mga libro). Ug kay linga man sab kaayo sila sa panginabuhi
aron pagtudlo sa ilang mga bata, nameligro diay nga di ka-eskuyla ang ilang
mga anak?
-o0o-
Dihang akong gipangutana si Oliva kon di ba makalapas ning ilang lagda sa
garantiya sa konstitusyon sa libreng edukasyon sa elementarya ug high
school, nipasabot siya nga igo lang siyang nagpatuman sa lagda sa kadagkoan
sa Departmento sa Edukasyon (DepEd). Dihang ako siyang giingnan nga kon wa
gyoy kuwartang ikapa-eskuyla sa mga bata sa kindergarten mahimo diayng di
makasud sa Grade One bisan 10 anyos na, gisubli ni Oliva nga wa siyay mahimo
sa pag-usab sa lagda.
Gipahibawo sab kong Oliva nga ang entrance examination dunay 60 ka
pangutana nga mahimo lang tubagon sa mga bata pinaagi sa sulti, di na
kinahanglang isuwat. Dihang ako siyang gipangutana unsaon paglahutay sa
atensiyon sa mga bata pagpaminaw ug pagtubag sa 60 ka pangutana, nipasalig
si Oliva nga nagsige na silag bansay-bansay sa ilang mga magtutudlo.
Tinuod gyod tingaling andam nang DepEd sa bag-ong programa kay wa pa
maapod-apod ang test papers sa pagsugod sa enrolment niadtong Lunes.
-o0o-
Maayo na lang kay gikurhian dayon ni Cebu City Councilor Jocelyn Pesquera
ang pahibawo ni Oliva. Matod niya dawaton gihapon sa Grade One bisan ang
mga bata nga mahagbong kay ang tuyo sa entrance examination mao ra ang
pagbahin sa mga bata base sa kalantip sa ilang salabotan. Niingon si
Pesquera nga usa sa ilang nakat-onan sa ilang biyahe sa Singapore mao nga
mas paspas ang pagtudlo kon ipunon ang mga brayt ug ilahi ang mga di kaayo
maayo sa klase.
Matod niya ang Syudad sa Sugbo pay naghimo ini pagkakaron, ubos sa pagtugot
sa DepEd. Kon molampos, ipatuman sab ni sa ubang bahin sa nasud.
-o0o-
Kining eksperimentoha gihimo na sa mga eskuylahan sukad pa niadtong dekada
60. Buot bang ipasabot sa atong mga opisyal nga kinahanglan pa silang
mobiyahe sa Singapore una makaklaro sa panginahanglan ini?
Taym pa, managsama kahang sistema sa edukasyon sa Singapore ang gipanid-an
nilang Oliva ug Pesquera? Nganong managlahi man ang ilang pagsabot sa tuyo
sa entrance examination? [30]

Email: leo_lastimosa@abs-cbn.com

_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/