Arangkada for May 27, 2005

PABILO SA GUBOT

Ang mga negosyante nga hangtod karon mangugat lang gihapon batok sa uminto
sa minimum nga suholan hiktin og panglantaw�way laing nakit-an gawas sa
tumoy sa ilang ilong. Ang ilang kataphaw mosumbalik ra nila. Segurong
mahiagoman ang mas dakong kadaot kay sa gilikayan nga gimao-mao ug gipaburot
nga kadaot nga mamugna sa uminto.
Dakong pagpakabuang ang panghunahuna nga bisan sa nagsaka nga presyo sa
nag-unang mga palaliton tungod sa paglayat sa presyo sa lana, bayranan sa
tubig ug kuryente ug pag-uminto sa plitehan�nga gikahadlokang madugangan pa
gyod inigsugod nag kolekta sa expanded value added tax unya sa Hulyo�mahimo
pa gyong tenkyuhon lang ang mga mamumuo pinaagi sa ulog-ulog nga
gikinahanglan sa nasudnong interes ang dugang nilang pagsakripisyo.
-o0o-
Ang kamatuoran mao nga ang mayoriya sa mga kompaniya makahatag sa tukmang
uminto sa minimum nga suholan. Pero ang kanunay lang nilang giwara-wara mao
ang gagmayng mga kompaniya. Pero di makiangayon nga iduhig ang tanang
trabahante tungod lang sa pipila ka kompaniya nga di makaabot.
Sama sa ilang pagbuot-buot nga i-data-data paghatag ang nangaging daginuton
nang daan nga mga uminto, ang wage boards may gahom sa pag-exempt sa
gagmayng mga kompaniya o sa pagtakda og nagkalainlaing uminto agad sa
katakos sa isigka kompaniya o industriya.
Ang padayong paghikaw sa mga mamumuo sa labing makiangayong mga uminto�nga
ilang gihagoan, wa tikasa ni tulisa�maoy pagdangilag sa higanteng kaguliyang
gikan sa sektor nga di nang kaagwanta sa kagutom ug katimawa.
-o0o-
Ang bisan unsang uminto sa suholan sa mga trabahante mahibalik ra gihapon
ngadto sa mga negosyante. Tungod sa way kinutoban nilang mga
panginahanglan, di mahitabong tagoan lang sa alkansiya sa mga anak sa singot
ang dugang nilang kinitaan. Ang mas dakong purchasing power nagkahulogan og
mas dakong halin ug mas dasig ug malambuong negosyo nga moresulta sa mas
dakong ginansiya.
Sa pikas bahin, ang paglansang sa ubos nga suholan atubangan sa nagkataas
nga presyo sa palaliton moresulta og ubos nga halin, menos nga produksiyon,
hiyos nga ginansiya ug luya nga negosyo. Ug ang gutom ug masuk-anong
katawhan di makatabang sa sitwasyon.
-o0o-
Angayng pahalipayan si Dole 7 Director Rodolfo Sabulao sa iyang paningkamot
pagkumbinser mga negosyante paghatag og mas dakong uminto kay sa ilang
gitanyag nga P12. Pero limitado ang iyang mahimo kay makabotar lang siya
kon dunay tabla. Nga di mahitabo kon kanunayng modapig sa mga negosyante
ang laing duha ka representante sa gobyerno.
Pero way inhustisya nga molungtad hangtod sa hangtod. Ang wage boards kon
magpatuyang sa ilang gibati maoy mopapas sa ilang kaugalingon. Kay di
kasuklan sa Kongreso ang nagkakusog nga awhag nga bakwion sa mga magbabalaod
pagsubli ug pagpalambo sa minimum nga suholan. [30]

Email: leo_lastimosa@abs-cbn.com

_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/