Arangkada for June 10, 2005

 

 

                  GARY GAMHANAN

 

Nahisgutan ang kontrobersiya sa eleksiyon sa Sugbo sa usa sa mga istorya sa telepono ni "Gary," nga giila sa oposisyon nga si Comelec Commissioner Virgilio Garcillano, sa mas taas nga audio recording nga gitoohang resulta sa wiretapping sa iyang telepono nga nilungtad og duha ka buwan, gikan sa Mayo hangtod sa Hunyo sa niaging tuig.

Kon tinuod ang ebidensiya, si Garcillano nakakuwarta sa hapit tanang maniobra sa eleksiyon sa nagkalainlaing bahin sa nasud. Apil na sa Sugbo.

-o0o-

Niang transcript nga gimantala sa blog sa Philippine Center for Investigative Journalism (www.pcij.org/blog/) sa istorya nga giingong nahitabo niadtong Hunyo 4, 2004, alas-8:45 sa gabii:

"Gary: Si ano?

Male:

Cebu? Yung sa Governor?

Gary:

Ewan ko kung kaylan aarya

Male:

Pare kung anong konsiderasyon pare ha, paki-declare si Garcia ha, tinanggal siya eh.

Gary:

Oo syempre, pinag-usapan natin yun eh.

Male:

Basta't may sinabi naman nya kung ano raw ang konting pang for disposal na, basta.

Gary:

O sige lang, ok lang Oo."

-o0o-

Kining maong panag-istorya sa telepono nahitabo samtang nag-ung-ong pa sa Comelec en banc ang petisyon ni kanhi kongresista Celestino Martinez Jr. pagpugong sa proklamasyon ni Gobernador Gwendolyn Garcia. Masabot gikan sa transcript nga si "Gary" wa pang kahibawo kanus-a iproklamar si Garcia human natangtang ang iyang kaso gikan sa lista sa mga kaso nga kahukman na.

Masabot sab nga nikalit lang og kalami si "Gary," nisaad nga dalion ang proklamasyon ni Garcia human siya pahinumdomi sa lalaking wa mailhi nga andam ang iyang grupong mohatag og bisan unsang "konsiderasyon." Katulo gyod mosanong si "Gary" ("O sige lang, ok lang, Oo") dihang gipahibawo siya sa lalaki nga andam si Garcia og dugang pang "for disposal na, basta."

Bisan kinsa man si "Gary," di gyod tingali siya ordinaryong lider sa politika sa administrasyon. Kay naproklamar man gyod si Garcia sa wa pa mapupos ang termino sa iyang amahan, si kanhi gobernador Pablo Garcia, bisan sa gibantog nga lig-ong koneksiyon sa mga Martinez sa Malakanyang.

-o0o-

Klarong si Press Secretary Ignacio Bunye ang gisakripisyo sa Malakanyang aron makalingkawas si Presidente Gloria Macapagal-Arroyo gikan sa labing uwahing krisis sa iyang administrasyon. Human nangugat nga di si Garcillano ang ka-istorya sa presidente, nibalitok na sab si Bunye ug niingon nga wa diay siyang kaseguro kon sa presidente bang tingog sa audio recording. Kuyawan ko nga ang sunod nga ikumpisal ni Bunye mao nga wa diay siyang kaila unsay CD ug cell phone.

Nagapos bang palasyo sa ilang kaugalingong lit-ag? Usa sa tigpaminaw sa DYAB Abante Bisaya, si M.C.B., may talagsaong paagi paghulagway sa bulilyaso sa administrasyon: Gi-martilyo sa administrasyon ang ilang ulo aron pag-iban sa kasakit. Pero nasobrahan rang kakusog, maong nabuang na hinuon. [30]  leo_lastimosa@abs-cbn.com