Arangkada for June 13, 2005

 

                      LISOD PEKEHON

 

            Unsaon nimo pagmaniobra ang tulo ka oras nga audio recording nga nagsentro sa tingog sa gidudahang si Comelec Commissioner Virgilio Garcillano nga:

Ø      Way usab-usab ang iyang tingog;

Ø      Way usab-usab ang estilo sa pag-istorya, bisan dihang nakig-istorya sa iyang asawa nga nag-shopping ug namalihug nga magpasugat sa ikaduhang andana sa shopping mall;

Ø      Way usab-usab ang iyang kasayon ug katakos nga niatiman sa nagkalainlaing mga problema sa iskutenyo nga gisumbong ngadto niya, apil nang nalangay nga proklamasyon ni Gobernador Gwendolyn Garcia sa Sugbo; ug

Ø      Way usab-usab ang iyang kamasaligon nga molihok ang armadong kusog, ang kapolisan ug ang election registrars bisan unsay iyang ipahimo nila, ug nga kadugangan niyang mga boto sa mga politikong nidangop niya nga di mosiwil sa statement of votes ug election returns?

-o0o-

            Ug unsaon nimo pagmaniobra ang tulo ka oras ug tulo ka CDs nga audio recording sa nagkalainlaing tingog nga nagpulipuli pagtawag o gipanawgan sa samang linya sa telepono:

Ø      Usa nila susama gyod sa tingog ni Presidente Gloria Macapagal-Arroyo, apil nang iyang ka-diretso, kakuwang og pailob ug kauga;

Ø      Ang lain mora gyong si First Gentleman Mike Arroyo, apil nang iyang sobrang bilib sa iyang gahom, kabugalbugalon sa ilang mga kaatbang ug bisyo pagpahinumdom ni bisan kinsa kinsay labing gamhanang koneksiyon ngadto sa iyang asawa;

Ø      Ang lain, kadtong tingog nga kuwang na lag dyutay nga magpakiluoy ug moluhod atubangan ni "Commissioner," susama gyod sa pagaw nga tingog ni kanhi senador Robert Barbers; ug

Ø      Ang uban pang mga tingog, apil na kadtong nanawag parte sa Sugbo nga giingon na karon ni kanhi senador John Osmena, pasidan-an hinuon ta mo nga di siya angayng toohan dayon kon parte na sa politika, nga susama gyod sa tingog ni GSIS President Winston Garcia, igsoon sa gobernador, ug Pagcor Chairman Ephraim Genuino, laing suod sa gobernador.

-o0o-

            Laing tilimad-on nga di peke ang audio recording mao ang pagkatarantar sa Malakanyang pagtaktak sa hepe sa Intelligence Service of the AFP, si Brig. Gen. Marlou Quevedo, ug gipulihan sa paryente ni Presidente Arroyo nga si Commodore Leonardo Calderno, ug pagtanggong sa barracks sa 120 ka operatiba sa ISAFP nga gipasanginlan sa "high-profile" wiretapping.   Tsamba ba lang nga nitakdo ni sa pangangkon ni kanhi NBI deputy director Samuel Ong nga taga ISAFP ang naghatag niya sa orihinal nga kopya sa recording?

            Ang kakuwang sa ligdong ug katoohang lider sa oposisyon mahimong nakapugong sa pag-awas sa katawhan sa kadalanan pagpalagpot ni Presidente Arroyo sa katungdanan.   Pero ang kamatinud-anon sa kalidad ug unod sa audio recording, labaw sa pila sa mga testigo nga nilambigit sa bana, bayaw ug anak sa presidente sa jueteng payola, maoy mosegurong way tarung kinatulgan ang Malakanyang sa umaabot nga mga adlaw.   [30]   leo_lastimosa@abs-cbn.com