Arangkada for June 14, 2005

 

 

                TUGBANG KINUWANGGOL

 

Kon wa pa lang unta did-i sa National Telecommunications Commission (NTC) ang mga estasyon sa radyo ug telebisyon sa pagsibya sa giingong audio recording sa istorya sa telepono nilang Presidente Gloria Macapagal-Arroyo ug Comelec Commissioner Virgilio Garcillano, ambot pila ray mosakripisyo sa ilang naandang mga programa aron paghatag og agianan sa kontrobersiyal nga recording.

Di ni tungod kay hadlok o sipsip ang media organizations sa administrasyon, kon dili tungod sa kabungol, kahinay ug ka-way klaro sa pipila ka bahin sa tulo ka oras ug tulo ka CDs nga recording. Ang mga bahin sa recording nga gipili ni Atty. Allan Paguia, nga gitoohang mao say gibasehan sa bersiyon nga gipagawas sa Malakanyang, gawas nga maoy naghisgot sa maniobra sa eleksiyon, mao say labing klaro.

Ang labing dakong problema sa media organizations mao ang pagdapit sa atensiyon sa publiko sa recording nga dunay pipila ka bahin nga, bisag unsaon nimog papilit sa imong dunggan sa speaker, lisod kaayong masabtan.

-o0o-

Pero salamat sa pagdili sa NTC, nagkadaghan ang mga tawo nga determinadong makapaminaw sa audio recording sa bisan unsang paagi. Na-triple ang trapiko sa web log sa DYAB Abante Bisaya human namo ipahibawo nga ma-download ang tulo ka oras nga recording gikan sa

http://dyab-cebu.blogspot.com ug sa indibiduwal nga web logs sa among mga programa.

Mahimong mahudlat ang mga estasyon sa radyo ug telebisyon (kay sigehan man mig pahinumdom sa mga torotot sa gobyerno nga ang among pagsibya di katungod kon dili usa lang ka pribilehiyo) ug ang mga pamantalaan (wa nay nasudnon ug lokal nga pamantalaan nga nipublikar sa kinatibuk-ang transcript human sa pasidaan nga ikiha sila sa gobyerno), pero di kapugngan sa NTC ang pagkatap sa audio recording, gawas lang kon may makit-an silang kahimanan nga mopahunong sa Internet.

Samtang mahimong nakaiban sa epekto sa recording ang una-unang pagpagawas ni Press Secretary Ignacio Bunye, ang iyang desperadong lakang ug ang pagdili sa NTC maoy garantiya nga toohan sa mas daghang tawo ang eskandalusong recording.

-o0o-

Si Thads Bentulan, akong paboritong kolumnista sa BusinessWorld, niinsistir nga makahimo ang mga estasyon sa radyo ug telebisyon pagsibya sa audio recording nga di makalapas sa pagdili sa NTC pinaagi sa pagbutang og waiver nga, "Wa mi motoo nga silang Presidente Arroyo ug Garcillano kining nag-istorya. Kon kinsa man gani tinuod nga tag-iya ning mosunod nga mga tingog, palihug pahibaw-a dayon mi nga gi-record ni nga way pagtugot gikan ninyo, aron amo dayong hunungon ang pagsibya ning audio recording."

Lain niyang sugyot nga ipabasa og drama talents ang tibuok transcript aron mabatian sa publiko ang kinatibuk-ang detalye sa audio recording nga di sila pul-an ni malapas ang pagdili sa gobyerno.

Reductio ad absurdum. Paundayonan ang kinuwanggol. [30]  leo_lastimosa@abs-cbn.com