Arangkada for June 15, 2005

 

                 ADLAW SA PANUDYA

 

Klarong nagsugod nang kataposan sa administrasyon ni Presidente Gloria Macapagal-Arroyo. Nag-unang mga tilimad-on mao ang wa na magkadimaong mga alkontra sa administrasyon sa seryusong mga pasangil sa pagpanikas sa niaging eleksiyon:

• Ang pagpabati ni Press Secretary Ignacio Bunye sa audio recording ngadto sa media sa giingong panag-istorya nilang Presidente Gloria Macapagal-Arroyo ug Comelec Commissioner Virgilio Garcillano, ug ang iyang pag-angkon nga ang usa sa mga tingog iya sa presidente;
• Ang ilang pagpada og gatosan ka mga polis ug mga sundawo uban ang duha ka armored personnel carriers sa ganghaan sa San Carlos Seminary nga maoy unang gidangpan ni kanhi NBI deputy director Samuel Ong human niangkon nga naa niya ang orihinal nga kopya sa kontrobersiyal nga tulo ka oras nga recording;
• Ang ilang pagdili sa mga estasyon sa radyo ug telebisyon pagsibya sa recording; ug
• Ang gidudahang pagpadagit sa pamilya ni T/Sgt. Vidal Doble, ang ahente sa ISAFP nga gitumbok nga maoy naghimo sa wiretapping, aron mapugos siya pagawas sa seminaryo.

-o0o-

Samtang napakyas ang oposisyon pagkabayo sa sitwasyon aron matuman ang dugay na nilang paglungut-lungot pagpuli sa Malakanyang, di sab kasinahan ang kalidad sa suportang nadawat ni Presidente Arroyo gikan sa iyang mga alyado:

• Ang Estados Unidos samtang nipadayag og hingpit nga suporta sa presidente nitanyag sab pag-authenticate sa audio recording nga gideklarar na mga eksperto sa US ug Australia nga ila gyong Arroyo ug Garcillano;
• Ang mga alyado sa presidente sa House of Representatives ug sa Senado samtang nipasalig nga nagsuporta gihapon sa administrasyon niinsistir nga sugdan na nilang imbestigasyon sa audio recording;
• Labing menos tulo ka mga senador sa administrasyon, samtang nilaro nga wa pa motoo sa mga pasangil batok sa presidente ug sa iyang pamilya, niawhag nang palagputon gikan sa Kongreso ang iyang anak ug bayaw, silang Mikey ug Iggy; ug
• Ang kinabag-an sa nangapil sa rally nga gipasiugdahan ni Cebu Governor Gwen Garcia pagsuporta ni Presidente Arroyo nabisto nga pinalit og P100 kada usa ug gihakot og buses nga giabangan sa gobyerno.

-o0o-

Si Garcillano wa nay trabaho. Wa na lab-asa ni Presidente Arroyo ang iyang appointment sa Comelec. Maong wa na pakita sa iyang upisina. Nitumaw hinuon nga ang mas dakong hinungdan mao ang paglikay niya gikan sa makapa-apiking mga pangutana sa media, kay kasaligang mga tinubdan nagbutyag nga dinhi siya sa Sugbo sa niaging semana ug nakigkuyog pa gani nilang Comelec 7 Director Salud Aliganga ug Asst. Director Manuel Advincula.

Lisod toohan nga mora nang sanglahon si Garcillano nga gilikayan sa Malakanyang. Kay kon tinuod ang audio recording, siya maoy labing sinaligang opisyal sa Comelec pagpatuman sa bisan unsang gustong mahitabo sa presidente sa niaging eleksiyon. [30]  leo_lastimosa@abs-cbn.com