Arangkada for June 16, 2005

 

                 UNAY SA TARI?

 

Si AFP Chief Efren Abu, di si kanhi NBI deputy director Samuel Ong, Atty. Allan Paguia o ang mga lider sa oposisyon, ang labing matulisok ning pagkabisto sa audio recording sa giingong panag-istorya nilang Presidente Gloria Macapagal-Arroyo ug kanhi Comelec Commissioner Virgilio Garcillano. Kay si Abu ray nakapangahas paglugpit sa dakong gahom sa Intelligence Service of the Armed Forces of the Philippines (ISAFP).

Ang ISAFP nga maoy gipasanginlang nagpakatap sa audio recording sa wiretapping nga ilang gihimo niadtong Mayo ug Hunyo sa niaging tuig igo lang nagpreserbar sa iyang teritoryo. Kay sa wa pa si Abu, direkta silang maka-report ngadto sa presidente. Ubos ni Abu, gipaubos na lang sila sa mas ubos sa military commands.

Si Presidente Arroyo bilib unta kaayo sa ISAFP. Pero tungod sa pagkapaso sa Malakanyang sa intelligence report nga manggubot ang mga dumadapig ni Fernando Poe Jr. atol sa iyang lubong, napugos ang presidente pagpaubos sa ISAFP kang Abu.

-o0o-

Ang pagduda nga ang ISAFP maoy utok sa wiretapping, nga unang nitumaw dihang gitaktak ang hepe ug gitanggong ang 120 ka operatiba sa ISAFP, karon gikalawat na bisan sa mga senador ug mga kongresista sa administrasyon. Si Kongresista Roilo Golez niawhag na gani nga relibohan ang AFP deputy chief, Admiral Tirso Danga, kinsa maoy hepe sa ISAFP atol sa eleksiyon sa niaging tuig.

Laing mga tilimad-on nga ang wiretapping wa itumong batok sa administrasyong Arroyo:

• Klaro nga ang tinuod nga target sa wiretapping mao si Garcillano, di ang presidente, naatol lang nga nanawag si Presidente Arroyo sa telepono ni Garcillano, ug maoy hinungdan nga naapil ang tawag sa asawa ni Garcillano nga igo lang nagpakuha gikan sa shopping mall; ug
• Wa gyod mokihol ang ISAFP pagbisto sa ebidensiya atol sa init nga iskutenyo sa eleksiyon ug sa paghusay sa protesta ni FPJ, nigawas na lang ang audio recording dihang gilaslasan nang Abu ang gahom sa ISAFP.

-o0o-

Sukwahi sa pangangkon nga wa pay kahimanan sa Pilipinas nga makapaminaw sa cellular phones nga nagamit sa bag-ong GSM technology, ang ISAFP gikatahong nakapalit og kahimanan niadtong 2002 nga makapaminaw og hangtod 500 ka cell phones sa usa ka higayon. Maong gawas ni Danga, sentro sab ron sa pagduda silang T/Sgt. Vidal Doble, ang gitumbok ni Ong nga tinubdan sa audio recording, ug Lt. Col. Allen Capuyan, hepe sa intelligence ug operations sa ISAFP.

Segun ni Glenda Gloria, managing editor sa Newsbreak, kansang report mogawas karon pang Sabado, si Senador Panfilo Lacson maoy usa sa unang nakakuha sa recording kay tawo niya si Doble niadto sa PAOCTF. Pero lisod toohan nga si Lacson ang utok sa wiretapping. Ug mas lisod toohan nga magbuotbuot silang Doble nga way pagtugot gikan sa labing dagkong mga opisyal sa ISAFP. [30]  leo_lastimosa@abs-cbn.com