Arangkada for June 17, 2005

 

               ABUNDANG EBIDENSIYA

 

Kon nagduda pa mo hangtod karon, ang gobyerno ni Presidente Gloria Macapagal-Arroyo nimatuod na nga ang kontrobersiyal nga audio recording tinuod nga nakuha gikan sa telepono ni kanhi Comelec Virgilio Garcillano nga gitawgan nilang Presidente Arroyo, First Gentleman Mike Arroyo, kanhi senador Robert Barbers ug ubang opisyal sa administrasyon:

• Si Press Secretary Ignacio Bunye maoy nag-una-una pagpabati sa media sa giingon niyang tinuod nga bersiyon sa audio recording (nga kon itandi sa bersiyon nga gipagawas ni Atty. Allan Paguia, klarong ang bersiyon ni Bunye maoy gi-doktoran);
• Ang bersiyon ni Bunye, sama sa bersiyon ni Paguia, naglakip sa tingog nilang Gloria ug Mike Arroyo (maayong pangitaon ang CD nga iyang giwara-wara sa Malakanyang ug isagpa sa nawong ni Bunye karong niingon nga wa na siyang kaseguro iya ba gyod sa presidente ang tingog).

-o0o-

Kon hangtod karon naglibog pa mo sa pangugat sa mga torotot sa Malakanyang nga ang recording mugna sa oposisyon aron pagtay-og sa gobyerno, ang administrasyon nimatuod na sab nga ang Intelligence Service of the Armed Forces of the Philippines (ISAFP) maoy responsable sa wiretapping:

• Human ibisto ni Bunye ang recording, dihang wa pay naghisgot kinsay responsable sa krimen, ang Malakanyang nitaktak dayon sa hepe ug nitanggong sa 120 ka operatiba sa ISAFP;
• Padayoang gitanggong si T/Sgt. Vidal Doble, nga unta giisip ra man siyang biktima sa "kidnapping" ni kanhi NBI deputy director Samuel Ong sa San Carlos Seminary; ug
• Si Kongresista Roilo Golez, kanhi national security adviser ni Presidente Arroyo, nidemanda nga relibohan si Admiral Tirso Danga, ang hepe sa ISAFP atol sa wiretapping, aron nga di niya ma-influencia ang imbestigasyon sa Kongreso.

-o0o-

Wa na mabag-ohi ang katawhan sa pagtak-om ni Presidente Arroyo labot sa recording. Kay trademark na sa administrasyon ang pagpanghunaw og responsibilidad sa mga kontrobersiya. Pero angayng pahinumdoman ang presidente nga siyay sentro ning labing bag-ong krisis, di na mahimong ipasa ngadtong Bunye ug ubang sakop sa gabinete.

Bisan ang iyang mga alyado nga gipangulohan ni kanhi presidente Fidel Ramos ni-apura na sa presidente pagdeklarar iya ba ang tingog sa audio recording. Kay ang iyang pagpakahilom sukwahi sa normal nga reaksiyon nga pagkisikisi ug panghimalingka sa usa ka tawo nga butangbutangan og sayop nga pasangil.

-o0o-

Salamat sa ban sa NTC, ang recording nga gustong luokon sa Malakanyang nadunggan na sa mas daghang tawo, labaw sa pipila ra untang makalahutay pagpaminaw sa bungol-ug-di-kaayo-maklarong-tulo-ka-oras nga mga istorya sa telepono.

Ang pagtahod sa kagawasan sa katawhan pagpakisayod makatabang unta nila pag-umol og ligdong nga baruganan. Tungod sa dakong haw-ang sa kasayurang gihigpitan sa gobyerno ug sa kauhaw sa kasayuran sa katawhan, peligrong ang di-kaayo-responsableng-mga tinubdan maoy moumol sa baruganan sa katawhan para nila. [30]  leo_lastimosa@abs-cbn.com