Arangkada for June 2, 2005

 

               KIAT SA KAGUTOM

 

Karong giduhig na sa kadagkoan sa militar silang Presidente Gloria Macapagal-Arroyo ug Defense Secretary Avelino Cruz, ug nga wa gyod mohimakak ang duha ka opisyal sa pangangkon nga nitugot sila sa eskandalusong pagtukod sa AFP og beach resort sa Boracay, natinuod ang kahadlok sa kadaghanan nga ang tibuok administrasyon gyod diay ang nipili sa pagpalabi sa ilang mga kapritso inay pag-una sa labing batakan ug dinaliang panginahanglan sa katawhan.

Mao diay nga atubangan sa kagutom ug katimawa sa kinabag-an, ang administrasyong Arroyo nitugot lang gihapon sa padayong pagdawat sa tambok nga mga suholan ug mga benepisyo sa mga opisyal samang GSIS President Winston Garcia, nilingiw lang sa pagpangompra og luhong mga sakyanan sama sa gihimo ni kanhi CIIF CEO Rolando Golez ug nangiyugpos lang sa paglaag-laag ug pagwaldas-waldas sa kuwarta, sama sa gihimo ni First Gentleman Mike Arroyo sa Las Vegas.

-o0o-

Ang kinabag-an sa kasundalohan nag-antos sa kagamay sa suholan ug benepisyo, kakuwang sa mga armas, mga bala ug ubang batakang mga gamit sama sa boots ug canteen (dagkong botelya so softdrinks ang sudlan nilag tubig). Nahingawa sab sila kay di silay nanag-iya sa bay ug luna nga ilang gipuy-an ug way klarong kadangpan kon mangasakit ang mga sakop sa ilang pamilya.

Ang tubag sa kadagkoan sa AFP? Kalingawan. Pasuruyon sa Boracay ang mga sundawo ug ang ilang pamilya. Kay para sa AFP mas seryusong problema ang posibleng pagkabungkag sa pamilya kay sa kagutom. Naglibog pa hinuon ko unsaon pagtapak sa busluton nga boots ug pagsaka sa suholan sa kasundalohan kon pataakon sila sa world class nga island resort.

-o0o-

Niinsistir si Nelson Yuvallos, ang Sugbuanong negosyante nga nitabang pagtukod sa pribadong foundation nga maoy nihatag sa donasyon para sa proyekto, nga lunsay ang ilang pagtabang ug di sila mangayo og pabor gikan sa AFP. Kon gusto gyong motabang ang grupo ni Yuvallos, nganong kiat man sa Boracay ang gigastohan inay hatagan sa mas mapuslanong scholarships ang mga anak sa kasundalohan?

Ang Kaibigan ng mga Kawal sa Kapuluan (KKK) di sab maayo og sinugdanan. Nagsugod nag sud og mga transaksiyon bisan wa pa marehistro sa SEC. Unsa pa may ubang kalapasan sa balaod nga ilang himoon pagduso sa binuang nilang proyekto?

-o0o-

Si Lt. Col. Jeffrey Omandam, tigpamaba sa Centcom, mapagarbuhong nipahibawo sa DYAB Abante Bisaya nga gipangayoan nilag hinabang ang tanan nilang bisita sa Kampo Lapulapu. Maong hastang mga sakop sa media nangamot og tag-P40 o tag-P100.

Angayng pahinumdoman si Omandam nga dunay balaod nga nagdili nilang mga opisyal sa gobyerno pagdawat og mga donasyon gikan sa pribadong mga indibiduwal o mga grupo, sama sa KKK. Angay sab siyang sultihan nga mas dakong krimen ang pagpangilkil. [30]   Email:  leo_lastimosa@abs-cbn.com