PAUGAT SA NAMFREL
Inanayng nituyhakaw pagbalik ang mga ebidensiya sa pagpanikas sa Mayo 10 sa niaging tuig. Nga, kon di pa tungod sa kontrobersiyal nga audio recording sa giingong panag-istorya nilang Presidente Gloria Macapagal-Arroyo ug kanhi Comelec Commissioner Virgilio Garcillano, motimpasaw na lang unta sa linaw dayong katunaw.
Kay way ganahang motoo sa tiyabaw sa tikas sa pilderong mga kandidato. Nasemento nang atong pagtoo nga tungod sa kahugaw sa sistema sa politika ining nasura—nga ang tanang kandidato gipasanginlang pulos nakalapas sa mga lagda sa Comelec—way bisan usang mapilde, ang di modaog segurong gitikasan. Pero mausab ning atong panglantaw kon kadasonan sa mga dokumento ug ubang klarong ebidensiya ang recording.
Kon mahitabo, ang tulo ka oras nga recording mahimong tinuod nga "smoking gun" batok sa administrasyong Arroyo.
-o0o-
Gawas sa Malakanyang, Comelec, AFP, PNP ug ubang ahensiya sa gobyerno nga naapiki sa recording, naduhig sab sa eskandalo ang pribadong tigbantay sa eleksiyon, ang National Citizens Movement for Free Elections (Namfrel). Labi na nga nagpaugat ang nasudnong liderato sa Namfrel pagsalikway sa mga ebidensiya nga gipresentar sa ilang mga representante sa Lanao del Sur sa gihulagway sa labing grabeng kaso sa "dagdag-bawas" sa tibuok nasud.
Giisnab ni Namfrel Secretary General Guillermo Luz ang mga dokumento nga gipresentar gahapon ni Namfrel Provincial Chairman Hadji Abdullah Dalidig sa Lanao del Sur nga nag-detalye pila ka boto ang gi-"dagdag" parang Presidente Arroyo sa mosunod nga mga lungsod:
- Balindong: 3,434;
- Marantao: 5,417;
- Saguiran: 5,523;
- Taraka: 3,952; ug
- Wao: 3,577.
Ang mga dokumento ni Dalidig nidason sa pangangkon sa
oposisyon sa mas dakong "dagdag-bawas" sa lima ka probinsiya ug 20 ka lungsod sa Autonomous Region in Muslim Mindanao (ARMM) nga niresulta sa pag-"dagdag" og 76,455 ka boto parang Presidente Arroyo ug pag-"bawas" og 41,313 botos gikan ni Fernando Poe Jr.
-o0o-
Niinsistir si Luz nga kon duna may tikas sa Lanao del Sur, di ni lapad ug wa makaapektar sa kinatibuk-ang resulta sa eleksiyon. Naneguro si Luz sa kamakiangayon sa ilang baruganan bisan kon 38% ra sa election returns sa Lanao del Sur ang ilang na-iskutenyo. Ambot duna pa bay motoo sa Namfrel sa umaabot nga mga eleksiyon karong gipagawas nang Dalidig ang iyang mga dokumento.
Usa sa mga anomaliya sa eleksiyon sa Lanao del Sur nga wa mabantayi sa Namfrel mao nga mas daghan ang mga boto sa party list groups kon ikumparar sa tanang botante nga nitunga sa mga presinto. Segun sa PCIJ, 100.3% sa mga botante ang nibotar sa 20 ka party list groups. Ambot nganong nipili ang nasudnong liderato sa Namfrel pagdupa sa kaligdong sa niaging eleksiyon atubangan ning klarong mga ebidensiya sa tikas. [30] leo_lastimosa@abs-cbn.com
No comments:
Post a Comment