Arangkada for June 30, 2005

 

ULOG-ULOG

 

Dunay mga demanda ang mga sakop sa gabinete nga wa pa matuman ni Presidente Gloria Macapagal-Arroyo: Ang pagpalagpot sa mga "alagad" ni First Gentleman Mike Arroyo nga maoy nagtungkawo sa PCSO, Pagcor, GSIS ug ubang ahensiya. Nga sama sa iyang pagpangayog pasaylo niadtong Lunes ug pag-exile sa iyang bana gahapon, kinahanglan niyang tumanon aron di sila mobiya sa administrasyon.

Inihap na ba lang ang malipayong mga adlaw nilang Winston Garcia sa GSIS, Ephraim Genuino sa Pagcor ug kuwestiyonableng mga sakop sa gabinete? Karong nangisog na si Susan Roces, makaluwas pa ba sa presidente kining klarong desperado niyang pag-ulog-ulog sa publiko?

-o0o-

Kon tinuod nga gi-wiretap si Presidente Arroyo, dunay seryusong buslot ang atong nasudnong seguridad. Kon ang labing sekreto ug importanteng mga mensahe sa telepono sa pangu sa republika mabatian sa mga tawong way pagtugot, unsa may garantiya nga di makuha sa mga kaaway sa nasud ug sa katawhan? Ug kon nabatian ang mga istorya sa presidente sa telepono, unsa may panagang aron di mabisto ang labing sensitibong kasayuran sa gobyerno nga gipasa di lang sa telepono kon dili hasta sa mga dokumento?

Makapahibung kaayo nga sa kadako sa implikasyon ngadto sa nasudnong seguridad sa gidudahang wiretapping sa panag-istorya nilang Presidente Arroyo ug kanhi Comelec commissioner Virgilio Garcillano, wa ni hisguti sa presidente, kinsa maoy direktang nabiktima ug mao untay labing masuko sa wiretapping, sa iyang duha na ka mensahe parte sa kontrobersiya.

-o0o-

Tungod ba ni kay naklaro sa audio recording nga ang gi-wiretap mao ang cellular phone ni Garcillano ug naatol lang nga nanawag niya o gitawag niya ang presidente? O tungod ba ni kay natarantar nang Malakanyang sa pag-ulbo sa krisis ug giisip nga mas dinalian ug importante ang iyang political survival kay sa pagtapak sa buslot sa seguridad?

Ang bugtong nahibaw-an nga lakang sa gobyerno parte sa wiretapping mao ang pagtangtang sa hepe ug pagtanggong sa 120 ka operatiba sa Intelligence Service of the Armed Forces of the Philippines (ISAFP), kasagaran nila mga sakop sa MIG 21, ang technical group nga maoy gitugyanan sa modernong kahimanan sa wiretapping nga makadungan pagpaminaw og 500 ka istorya sa cellphones.

-o0o-

Dihang ilang "giluwas" si T/Sgt. Vidal Doble, ang gidudahang naghimo sa wiretapping, mas interesado ang militar ug kapolisan sa pagpapirma niyag affidavit nga naglambigit ni Laarni Enriquez, ang kabit ni kanhi presidente Joseph Estrada, ug sa iyang P2 milyones sa pagamit sa audio recording para sa destabilization.

Mahimo hinuong nakabuylo na sa tago ang imbestigasyon sa wiretapping kay wa man ipakita si Doble sa publiko hangtod karon. Pero ang kakalma sa Malakanyang nakapasamot sa pagduda nga ang ISAFP maoy gisugo sa presidente paghimo sa wiretapping aron pagseguro nga di mobalitok si Garcillano sa oposisyon. [30]  leo_lastimosa@abs-cbn.com