Arangkada for June 4, 2005

KINSAY MALIPAT?

Kon sa sunod tuig pa pilion ang mga delegado sa constitutional convention
nga tahasan pag-usab sa konstitusyon, nganong karon pa lang, pito pa ka
buwan una matapos ang tuig, gibandera na man ni Presidente Gloria
Macapagal-Arroyo ang iyang plano pagpatawag sa nasudnong eleksiyon ug
pag-usab sa sistema sa gobyerno ngadto sa parliamentary ug dayon federal?
Naatol ba lang nga gihimo niyang makapakugang nga pahibawo samtang naapiki
ang iyang administrasyon sa sibaw nga mga pasangil nga naglambigit sa iyang
bana, si First Gentleman Mike Arroyo, ug anak, si Kongresista Mikey Arroyo,
sa multi-milyones pesos nga payola sa jueteng?
Naatol ba lang nga ang iyang pahibawo makamugna og init ug emosyonal nga
nasudnong lalis nga segurong makapalipat sa kinabag-an sa katawhan gikan sa
pagsunod sa dugang pang mga ebidensiya nga mahimong mapagawas sa mosunod nga
mga adlaw sa labing bag-ong eskandalo sa administrasyon?
-o0o-
Hangtod karon, nagdumili pa gihapon si Presidente Arroyo pag-angkon sa
tinuod nga hinungdan sa higanteng pagtibugsok sa iyang popularidad ngadto sa
negative 33%, nga maoy labing ubos sa tanang presidenteng nakalingkod sa
Malakanyang. Niinsistir lang gihapon ang iyang mga torotot nga tungod ni sa
paglayat sa presyo sa lana.
Samang linya ang ilang gilawog ngadto sa kadagkoan sa industriya sa media,
advertising ug pelikula aron mapatuman ang plano nga bombardiyohan ang
publiko sa kampanya sa propaganda nga way labot ang presidente sa pagsaka sa
presyo sa lana. Gibugoan gyod diay si Presidente Arroyo sa katawhan. Para
niya lisod pasabton ang publiko nga di niya makontrolar ang kalibotanong
merkado sa lana.
Siyay mas lisod pasabton nga ang tinuod nga hinungdan nganong nawad-an nag
pagsalig ang kinabag-an sa katawhan niya mao ang iyang kapakyas pagbadlong
sa nagkalapad nga pangurakot ug mga eskandalo sa iyang administrasyon.
-o0o-
Pormal nang gilusad ang DYAB Kapamilya Run, ang tinuig nga lumba sa dagan,
nga i-atol sa anibersaryo sa DYAB Abante Bisaya unya sa sunod Dominggo,
Hunyo 12. Naa na sa iyang ikalimang tuig, ang Kapamilya Run gipaabot nga
salmotan sa gatosan ka individual runners ug mga sakop sa nagkalainlaing
running clubs sa Sugbo, Kabisay-an ug Mindanao. Karong tuiga, ang Kapamilya
Run magsugod ug mahuman sa Cebu Business Park ug molatas sa palibot nga
kadalanan sa Cebu City.
Ang labing inilang runners magtigi sa 10-kilometros nga lumba samtang ang
mga bata nga 12 anyos paubos maoy moapil sa singko-kilometros nga lumba.
Ug aron pagtimaan sa ika-10 nga anibersaryo sa DYAB, gidasig ang mga amahan,
mga inahan ug mga anak sa pag-apil isip mahigugmaon, malipayon ug
nagkahiusang pamilya sa tres kilometros nga fun run.
Ang ika-10 nga anibersaryo sa DYAB Abante Bisaya nagda sa tema: "DYAB Abot
Nag Napu, Wa Nay Kaugpo!" [30]

Email: leo_lastimosa@abs-cbn.com

_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/