Karong niangkon nang oposisyon nga wa silay igong numero sa pag-impeach ni Presidente Arroyo, angay na ba tang mowaling sa atong atensiyon ngadto sa ubang mga kontrobersiya?
Karong nideklarar nang National Bureau of Investigation (NBI) nga pulos "tampered" ang duha ka bersiyon sa audio recordings nga gihatag sa Malakanyang ngadto sa mga sakop sa media, angay na ba natong ipadaplin ang isyu nga bunga lang sa way kinutobang bugno sa mga politiko sa administrasyon ug oposisyon?
-o0o-
Nahadlok kong daghan pa kaayong mga pangutana nga wa matubag aron hingpit nga papahuwayon ang kontrobersiya. Ang pagpagawas sa Malakanyang sa duha ka bersiyon sa audio recordings nakapalubong ni Presidente Arroyo sa mas lawom nga gahong. Kon ilang ikiha si Atty. Allan Paguia, kanhi abogado ni kanhi presidente Joseph Estrada, nga ni-angkon nga maoy nagsumpay ug nag-annotate sa recordings, iapil ba sab nila si Press Secretary Ignacio Bunye nga maoy nangunay pagsangyaw ngadto sa publiko sa gihulagway nga ilegal nga materyal?
Kon kalapasan sa balaod ang paghupot sa mga materyal nga bunga sa wiretapping, unsaon man paglingkawas ni Bunye gikan sa krimen? Nakapabanhaw ni sa kahadlok nga matental ang administrasyon paghimog kalapasan sa balaod nga mas dako pa kay sa gustong tabonan nga orihinal nga krimen.
-o0o-
Kadaghan nako paminawa ang duha ka bersiyon sa audio recordings gikan sa Malakanyang. Tinuod nga mas tin-aw ug mas kusog sa gihulagway sa Malakanyang nga orihinal nga bersiyon. Lata ang kalidad ug mas hinay ang gihulagway sa Palasyo nga "altered version."
Kon unahon nimog paminaw ang "original version," segurong makumbinser ka nga ang mga istorya sa telepono normal nga mahitabo tali sa kandidata ug sa mga nagduma sa iyang kampanya. Pero kon imong itandi sa "altered version," maklaro nimo nga ang bersiyon sa Malakanyang maoy klaro nga gi-doktoran.
-o0o-
Di ko eksperto sa teknolohiya sa recording pero ang akong 21 ka tuig nga kasinatian sa radyo nakabaid sa akong dunggan sa pagpaminaw sa mga tingog—kay tingog ra may among bugtong kahimanan pakigsulti sa mga tigpaminaw sa radyo.
Ang "altered version" mas matinud-anon kay managsama ang kasaba sa background ug nagsapaway pa gani ang tingog nilang Presidente Arroyo, sa iyang bana ug ni "Gary." Samtang ang tingog ni "Gary" sa bersiyon sa Malakanyang mas batan-on, mokalit lag kahilom ang background inig-tingog niya ug, labaw sa tanan, klaro siyang nagbasa og script, nga gibase sa transcription sa orihinal nga gisulti sa orihinal nga "Gary" ug gitumong paghimong mas inosente sa kontrobersiyal nilang panag-istorya. [30] leo_lastimosa@abs-cbn.com
No comments:
Post a Comment