Arangkada for July 12, 2005

 

BRASO UG BAKAK

 

Atol sa tigom sa gabinete niadtong Hulyo 5, usa ka buwan human giwarawara ni Press Secretary Ignacio Bunye ang audio recording sa giingong panag-istorya nilang Presidente Gloria Macapagal-Arroyo ug kanhi Comelec Commissioner Virgilio Garcillano, ug usa ka semana human nangayog pasaylo ang presidente sa iyang pakig-istorya sa usa ka "opisyal sa Comelec" aron "pagpanalipod sa iyang mga boto," nakugang ang ligdong nga mga sakop sa gabinete sa bag-ong direksiyon nga giumol sa Malakanyang aron pag-alkontra sa lapad nga mga protesta para sa resignasyon ni Presidente Arroyo:

• Ang pasigehon nag atubang sa media mao silang Davao City Mayor Rodrigo Duterte, Ilocos Sur Governor Chavit Singson ug Puerto Princesa City Mayor Edward Hagedorn, samtang ang mobanos pagduma sa krisis mao nang retiradong mga heneral nga sila si Interior Secretary Angelo Reyes, Transportation Secretary Leandro Mendoza ug Highways Secretary Hermogenes Ebdane, aron pagpakita sa "dagkong braso" sa administrasyon; ug
• Gisubli ang sugyot, nga natuki na sa nangaging mga tigom sa gabinete, nga mogahin sila og dakong kuwarta aron ipamayad sa mga sakop sa media pagseguro nga mayoriya sa mga magsisibya ug mga peryodista mopabor sa pagpabilin ni Presidente Arroyo sa katungdanan.

-o0o-

Kon tinuod ang pangangkon sa nang-resign nga mga sakop sa gabinete nga gipangulohan ni Finance Secretary Cesar Purisima, di na ta maglibog nganong way tihiktihik ang panghudlat ug panghaylo nga gipabaha sa administrasyon sa pag-ulbo sa labing uwahing eskandalo nga nitay-og sa administrasyon. May sukaranan ang ilang kahadlok nga di managana ang Malakanyang pagamit og puwersa ug busa mamahimong duguon kon molapad ang umaabot nga mga protesta batok sa administrasyon.

Ang nagkadungan nga panghudlat nilang Duterte, Singson ug Hagedorn pagbuwag gikan sa republika kon palagputon gyod si Presidente Arroyo sa katungdanan di diay inosenteng pasidaan sa lokal nga mga opisyal nga nanalipod sa ilang lider. Kabahin na diay to sa agresibong propaganda sa pamakak nga gilusad sa Malakanyang aron paghadlok ug pag-ilad sa kinabag-an.

-o0o-

Ang kuwartang gipabaha sa Malakanyang para sa mga sakop sa media niresulta na. Wa pasayloa silang kanhi presidente Cory Aquino ug ang mga sakop sa gabinete nga nang-resign sa makalilisang nga pagpanamastamas ug pakauwaw nga gilusad sa mga torotot sa presidente.

Angayng pahinumdoman si Presidente Arroyo sa leksiyon sa kasaysayan nga mahimong iyang nataligam-an. Napamatud-an sa pagkapukan sa diktadura ni kanhi presidente Ferdinand Marcos duha ka dekada nang nilabay nga way bisan unsa kagamhanan sa hulga ug bakak nga makapiog sa katawhang nahigmata na.

Si Presidente Arroyo, sama ni Marcos, nitoo sa iyang kaugalingong propaganda. Nakumbinser nga makalingkawas sa panudya sa bangis nga krimen nga iyang nahimo batok sa katawhan pinaagi sa pagtapok sa tradisyonal nga mga politiko. Nga kon maapiki na, segurong manglayat ngadto sa bag-ong mga agawon nga ilang ka-ulog-ulogan. [30]  leo_lastimosa@abs-cbn.com