Arangkada for July 14, 2005

 

P2M NI DOBLE

 

Kon nagsulti sa tinuod si Marietta Santos, ang uyab ni T/Sgt. Vidal Doble, di kahadlok sa seguridad ray nakapugong ni Atty. Samuel Ong, kanhi deputy director sa National Bureau of Investigation (NBI), pag-atubang sa Kongreso nga nagsusi sa audio recording sa istorya nilang Presidente Gloria Macapagal-Arroyo ug kanhi Comelec Commissioner Virgilio Garcillano.

Maglisod si Ong pagpasabot nganong gibayran niyag P2 milyones si Doble bugti sa "mother of all tapes." Diin man gikan ang kuwarta? Kinuha ba lang ni Doble gikan sa hangin o may sukaranan ang pasangil nga gikang Laarni Enriquez, kabit ni kanhi presidente Joseph Estrada, ang dakong kuwarta?

-o0o-

Dugang eskandalusong mga detalye sa kinabuhi ni Doble nga nitumaw human nabisto nga usa siya sa nag-wiretap sa cellular phone ni Garcillano nga gitawgan sa presidente ka-15 ka higayon niadtong Mayo ug Hunyo sa niaging tuig:

• Tulo ang iyang babaye, si Santos maoy numero tres, wa pa mailhing numero dos;
• Napugos si Doble pagawas sa San Carlos Seminary diin siya nitago uban nilang Ong ug Santos kay nakuha sa Intelligence Services of the Armed Forces of the Philippines (ISAFP) ang iyang tinuod nga asawa, si Arlene, ug duha nila ka anak gikan sa Kidapawan;
• Mahimong natental si Doble pagbaligya sa Garci tapes kay kanunayng kuwang ang kuwarta tungod sa iyang ka-bohemyo; ug
• Nahibung ang iyang kaubanan sa ISAFP nga nikalit lag kadaghang kuwarta ni Doble pila ka semana sa wa pa iwara-wara ni Press Secretary Ignacio Bunye sa Malakanyang ang iyang kopya sa Garci tapes.

-o0o-

Gawas sa pagsalikway ni Santos sa pangangkon ni Doble nga gidagit silang Ong ug gitanggong sa seminaryo, gibisto sa Philippine Center for Investigative Journalism (PCIJ) ang pagkaduhig ni Doble sa away sa duha ka inilang obispo sa Simbahang Katoliko: Silang Teodoro Bacani ug Socrates Villegas.

Si Bacani maoy nipasud nilang Doble, Santos ug Ong sa seminaryo; samtang si Villegas maoy nikuha ni Doble sa seminaryo ug nitugyan niya sa kasundalohan nga nagda og armored personnel carrier.

-o0o-

Mas unang nakakuha sa Garci tapes kay nilang kanhi senador Francisco Tatad ug Atty. Allan Paguia, kansang kopya maoy gipaminaw sa mga kongresista, silang Senador Panfilo Lacson ug kanhi solicitor general Frank Chavez. Gihatag ni Tatad ang iyang kopya ngadtong Paguia Mayo 15 ning tuiga, ilang Lacson ug Chavez sa Abril pa. Posibleng mas sayong niabot ang kopya ni Tatad pero Mayo na siyang niabot gikan sa gawas sa nasud.

Si Chavez dunay bersiyon giunsa pagkuha sa Malakanyang ang ilang kopya sa Garci tapes: Silang NBI Director Reynaldo Wycoco ug kanhi NBI 7 director Reynaldo Esmeralda maoy nipabati ini nilang Presidente Arroyo ug Bunye sa Malakanyang. Nahugno ang presidente ug si Bunye maoy nag-una-una pagpabati sa publiko sa peke nga bersiyon. [30]  leo_lastimosa@abs-cbn.com