Arangkada for July 21, 2005

 

MGA KONTRABIDA

 

Si Luis "Chavit" Singson nabantog sa iyang kabagis ug ka-relasyon nga bold stars. Pero usa siya sa gipasidunggan sa pagpalagpot sa kurakot nga pamunoan ni kanhi presidente Joseph Estrada niadtong 2001.

Silang Juan Ponce Enrile ug Fidel Ramos gikaintapan nga mga berdugo sa martial law sa diktador nga si Ferdinand Marcos. Pero silay nahimong bayani sa Edsa 1 nga nipalingkod ni kanhi presidente Corazon Aquino sa Malakanyang niadtong 1986.

Si Atty. Allan Paguia maoy abogado ug torotot ni Erap. Pero siyay nahimong instrumento sa pagpagawas sa Garci tapes nga kon kapamatud-an mahimong maoy mopalagpot ni Presidente Gloria Macapagal-Arroyo sa katungdanan.

-o0o-

Naapil sila sa mas taas nga listahan sa kasaysayan sa mga kontrabida kansang mantsado nga kagahapon napapas sa mga pasidungog tungod sa ilang wa paabotang tampo sa pagbisto ug pagbadlong sa malupigon, abusado ug mapahimuslanong mga pamunoan.

Sa eskandalong nakatay-og karon sa administrasyong Arroyo, wa pay klaro kinsay sunod nga Chavit, o Johnny, o Eddie. Pero nag-unang kandidata mao si Sandra Cam, ang nikumpisal nga tigkolekta sa payola sa jueteng para sa bana, anak ug bayaw ni Presidente Arroyo ug ang wa pa nganli nga politiko nga gihulagway ni Arsobispo Oscar Cruz nga maoy labing suhiton sa giingong kalambigitan sa presidente sa jueteng.

Maglisod pag-qualify si kanhi senador John Osmena.

-o0o-

Klaro si Osmena nga igo lang nikabayo sa sitwasyon. Naghuwat siya nga motakilid nang administrasyon una nipahibawo sa iyang pagbalitok ngadto sa oposisyon. Ang kabasa na sa papel ni Osmena maoy hinungdan nga bisan topnotcher siya sa nangaging lokal ug nasudnong mga eleksiyon sa Sugbo, way nahibung nga sa labing unang higayon sa iyang pamolitika gipilde ug gibasura siya sa mga Sugbuanon.

Maong bisan pag moingon si Osmena nga mosawop ang adlaw karong hapon, daghang Sugbuanon ang magduda sa iyang kamatinud-anon. Mao nay ganti sa iyang kamapahitas-on nga naglakip sa iyang paghudlat sa mga Sugbuanon nga magpuasa sila tungod sa ilang pagsalikway ni Erap.

-o0o-

Pero nagtoo ko nga, sama nilang Singson, Ramos, Enrile ug Paguia, si Osmena dunay importanteng papel nga huptan sa pagbisto sa kinatibuk-ang langyab sa Gloriagate scandal. Sa tanang mga politiko, siyay labing unang nakahimog makuting pagtuon sa resulta sa niaging eleksiyon, nga wa magpaabot sa langayng proseso sa Comelec (ang iyang election protest batok ni Senador Rodolfo Biazon di kairog hangtod makahatag si Vice Presidential Candidate Loren Legarda sa kapin sa P80 milyones para sa recount sa mga balotang naapil sa iyang protesta batok ni Bise Presidente Noli de Castro).

Ang kahinog ni Osmena sa politika mahimong maoy makagiya niya paghipos sa mga dokumento nga mas mopalig-on pa sa kasayuran sa Garci tapes. Ang iyang ka-oportunista mahimong makaalagad sa mas dakong nasudnong interes. [30]  leo_lastimosa@abs-cbn.com