IYAHONG TANAN
Ambot tungod ba sa naghigwaos niyang determinasyon pagpabilin sa labing taas nga katungdanan sa nasud, o tungod ba sa ka-wa na niyay salig bisan sa labing suod niyang mga alyado sa Kongreso human siya biyai sa iyang labing sinaligang mga sakop sa gabinete, o di na lang gyod ganahang mokumpiyansa bisan gamay sa pagpanalipod sa iyang kaugalingon, si Presidente Gloria Macapagal-Arroyo, sinalikway ang bisan unsang lama sa kaikog ug kauwaw, nideklarar nga siyay mangunay pagtudlo sa mga imbestigador nga mo-imbestigar sa seryusong mga pasangil batok niya.
Nisibaw nang mga pagsaway nga si Presidente Arroyo nagpabaga ug nagpapating sa iyang pagpamugos pagpabilin sa puwesto bisan sa pagtibugsok sa pagsalig sa kinabag-an sa katawhan human nabisto ang lisod lalison nga ebidensiya sa iyang pagmaniobra sa resulta sa eleksiyon sa niaging tuig ug pagkawat sa mandato sa mga botante nga ang mayoriya lain untay gipili pagka-presidente. Pero way bisan usang nakaandam ning labing uwahi niyang paugat.
-o0o-
Bisan ang mga alyado ni Presidente Arroyo sa duha ka bay balaoranan sa Kongreso nikuwestiyon di lang sa legalidad kon dili hasta sa kamakiangayon sa iyang pagdalidali pagtukod og iyang kaugalingong Truth Commission. Klarong nainsulto ang iyang alyadong mga senador ug mga kongresista kinsa nag-andam na unta og mga balaodnon pagtukod og komisyon nga tinuorayng independente, o labing menos di direktang kapasanginlan nga ubos sa influencia gikan sa Malakanyang.
Pero ang pagbaraw sa Malakanyang sa plano sa Kongreso maoy klarong tilimad-on nga di na ganahang mosugal ang grupo ni Presidente Arroyo sa iyang kaugmaon ngadto sa mga politiko nga dunay personal nga mga ambisyon nga mahimong di motakdo sa plano sa Palasyo. Pasidaan sab ni Malakanyang nga di sila moduko sa Cha-Cha ug ubang giluto nga mga putahe nga molaslas sa lima pa ka tuig nga nahibilin sa termino ni Presidente Arroyo.
-o0o-
Dihang nagtakilid nang Administrasyong Arroyo, nga morang usa ka litik na lay kuwang ug matumba na, si kanhi presidente Fidel Ramos ang niluwas niya pinaagi sa pagsugyot nga usbon ang sistema sa gobyerno ug himoon na lang caretaker si Arroyo hangtod nga mapahigayon ang eleksiyon sa bag-ong mga sakop sa bay balaoranan sunod tuig. Tungod sa iyang kahinangop nga nalugwayan ang naapiki na niyang pamunoan, way laing kapilian ang presidente gawas sa pagdason sa bisan unsang gipanulti nilang Ramos ug ni House Speaker Jose de Venecia.
Pero temporaryo rang iyang kakugang. Dihang nakaamgo nga sila pay naghupot sa higanteng makinarya sa gobyerno, nideklarar dayon ang mga torotot sa presidente, nga gipangulohan ni Presidential Management Staff Chief Rigoberto Tiglao, nga di mouyon ang presidente sa bisan unsang laslas sa iyang termino.
Sa ato pa, mosugot sila sa Cha-Cha, impeachment ug Truth Commission. Pero silay magbuot unsaon. [30] leo_lastimosa@abs-cbn.com
No comments:
Post a Comment