Arangkada for July 24, 2005

              TV NI GLO

 

       Human sa nabulilyaso niyang pagpangayo og pasaylo sa nasudnong telebisyon, nga maoy labing taas og rating sa tanang programa sa telebisyon sa tibuok nasud, wa moatubang sa kamera si Presidente Gloria Macapagal-Arroyo sa pagpadangat sa nisunod niyang mga mensahe.  Gawas sa kahanap sa iyang mensahe, gisaway ang presidente tungod sa ahat nga pag-inartista pagpaubos sa iyang tingog (ang zoom-in sa camera pag-ingon niyag "I'm sorry" gihulagway nga bastos nga pagsuway sa Malakanyang pagpaburot sa drama).

Maong sa nisunod nga mga adlaw, ang mikropono na lang sa Radyo ng Bayan ang gigamit sa iyang pagdemanda sa resignasyon sa tanang sakop sa gabinete, paghangop sa pagdumili sa Catholic Bishops Conference of the Philippines (CBCP) pag-awhag sa iyang resignasyon ug pagdason sa charter change nga giduso sa politikanhong mga partido atol sa tigom nga giduma ni House Speaker Jose de Venecia.

-o0o-

       Ang sunod nga pagpakita sa presidente sa nasudnong telebisyon nakapakugang sa mga nagtoo nga nisurender na siya sa iyang ka-bakikaw atubangan sa kamera nga giisip nga mas gamhanan kay sa mikropono ug mga pamantalaan.  Atubangan sa Filipino-Americans nga niduaw niya sa Malakanyang, isog, klaro ug dasig ang iyang pasidaan sa iyang mga kaatbang nga ipahamtang niyang balaod kon modangop sila sa ilegal nga paagi pagpalagpot niya sa katungdanan.

       Ambot tsamba ba lang, o tungod ba kay nakumbinser ang mga negosyante nga kontrolado pa niyang sitwasyon, nilig-on ang peso ug nidasig ang stock market niadtong adlawa.  Bisan naapiki sa nagkalapad nga krisis, naka-iskor og kadaogan ang pagpakita og balik ni Presidente Arroyo sa telebisyon.

-o0o-

       Ang sunod niyang pagpakita sa nasudnong telebisyon wa paabota.  Nagtan-aw ko sa newscast sa ABS-CBN News Channel (ANC) dihang kalit nga gipakita si Presidente Arroyo nga naglingkod atubangan sa usa ka babaye ug tulo ka lalaki sud sa Malakanyang.  Gipahibawo sa presidente nga nagkasabot nang nabulilyaso nga pre-need company ug ang nikha nga mga ginikanan ug nga gamiton niyang kuwarta sa GSIS pagtabang sa mga tinun-an nga wa nang ka-eskuyla.

       Mas nadapit ang akong pagtagad sa kaburot ug kalagom sa eyebags sa presidente nga wa hingpit kataboni sa iyang makeup.  Wa katabang ang luspad nga video sa NBN, ang TV Channel sa gobyerno nga maoy gi-hookup sa ANC.

-o0o-

       Human sa pipila ka gutlo nibarug ang presidente, nanamilit ug bakikaw nga nitangtang sa lapel microphone nga gipatapot sa liab sa iyang sinina.  Mao ra to?

       Human nitago sa kamera sa iyang paglahugay sa gabinete, pagpasalamat sa CBCP ug paghangop sa Cha-Cha, niatubang ang presidente sa kamera aron lang pagsulbad sa problema sa usa ka pre-need company?

       Sa di pa siya hingpit nga mapalagpot sa Malakanyang, maayo tingaling patiran sa presidente ang iyang mga torotot nga klarong nagduwaduwa sa iyang imahe.  [30]  leo_lastimosa@abs-cbn.com