Arangkada for July 4, 2005

 

                HADLOK NI ONG

 

Kon nagpaabot kang mauwaw ug boluntaryong mo-resign si Presidente Gloria Macapagal-Arroyo human nabisto nga nakigkonsabo siyang kanhi Comelec Commissioner Virgilio Garcillano sa pagamit sa kapolisan, militar ug kinatibuk-ang makinarya sa gobyerno aron pagtikas sa resulta sa eleksiyon sa Mayo sa niaging tuig, basaha ni ug hilak.

Madutlan pa bag uwaw ang usa ka politiko nga way kukaikog nga nimaniobra sa iskutenyo sa balaanong mga boto sa katawhan aron lang magpabilin siya sa gahom? May luna pa ba sa bisan gamay na lang kaikog ang itom nga kasingkasing sa usa ka politiko nga wa managana pagtampok sa bukubuko sa katawhan ug pagkawat sa ilang mandato?

-o0o-

Maong makapaabot ta og dugang mga maniobra nga pasiugdahan ni Presidente Arroyo sa mosunod nga mga adlaw aron pagseguro nga makatiwas siya sa iyang termino. Sama sa iyang pagsakripisyo ni kanhi senador Robert Barbers, kanhi kongresista Celestino Martinez Jr. ug ubang mga lider niya sa politika aron lang nga di malilian ang pagpaburot sa iyang mga boto sa niaging eleksiyon, di na ta makugang kon isakripisyo ang uban pa niyang mga alyado ug bisan ang iyang bana aron lang di siya mapalagpot.

Mahimong mahinayon na gyod karong semanaha ang wa mahitabo suma sa gipaabot sa niaging semana nga lapad nga lahugay sa gabinete ug mga korporasyon sa gobyerno nga gikontrolar sa nangalisbo nga mga batabata ni First Gentleman Mike Arroyo. Pero ang labing dakong problema sa presidente, labaw kay sa posibleng pagbisto sa iyang mga panaktakon sa dugang mga anomaliya sa iyang administrasyon, mao ang pagkumbinser sa lab-as, ligdong ug takos nga mga talento pag-alagad sa nagkabulingit na niyang pamunoan.

-o0o-

Karong semanaha, gipaabot nga moatubang na gyod sa mga kongresista si kanhi NBI deputy director Samuel Ong ug, labaw sa tanan, mapabati na gyod sa tibuok nasud ang sud sa iyang gitawag nga "mother of all tapes." Mas makadaot gyod tingali sa administrasyon ang sud sa recording nga iyang gihuptan. Kay kon sama ra sa tulo ka oras nga recording nga nahuptan ni Atty. Allan Paguia, nganong gigukod man pag-ayo sa gobyerno si Ong samtang gipasagdan lang si Paguia nga makaatubang sa mga kongresista?

Mga tilimad-on nga mas hadlok ang Malakanyang sa ebidensiyang gihuptan ni Ong:

• Gipadad-an siyag gatosan ka polis ug mga sundawo ug duha ka armoured personnel carriers ang iyang gidangpan nga San Carlos Seminary;
• Gipasanginlang nidagit ni T/Sgt. Vidal Doble sa ISAFP kinsa, usa ka semana human gisukwahi ni Presidente Arroyo ang baleg tulo ka semana nilang cover-up, padayon pa nilang gitanggong ug gitago gikan sa media;
• Di mopasalig sa iyang seguridad ang House of Representatives gikan sa iyang safehouse paingon sa Batasang Pambansa complex; ug
• Wa pa gani siyang kapabati sa iyang tape, gipasakaan na siya ni Justice Secretary Raul Gonzalez sa iyang paboritong hudlat ug kaso, "inciting to sedition." [30]   leo_lastimosa@abs-cbn.com