Arangkada for July 8, 2005

 

                MAS DAKONG ATRASO

 

Duha ka posibleng katin-awan nganong wa mokihol si Presidente Gloria Macapagal-Arroyo pagsusi kinsay utok sa pag-wiretap sa cellular phone ni kanhi Comelec Commissioner Virgilio Garcillano nga iyang gitawgan og labing menos ka-15 ka higayon samtang nagpadayon pang iskutenyo sa eleksiyon niadtong Mayo ug Hunyo sa niaging tuig:

• Mahimong may labot ang presidente sa pag-wiretap ni Garcillano aron pagseguro nga di siya mobalitok sa kampo ni Fernando Poe Jr.; o
• Nahadlok ang presidente nga kon mahibaw-an ang tinuod nga mga sirkumstansiya sa wiretapping, mabisto nga nakahimo diay siya og kalapasan nga mahimong mas grabe pa kay sa pagtikas sa niaging eleksiyon.

-o0o-

Kon toohan ang mga tinubdan sa abogado ni kanhi NBI deputy director Samuel Ong, si Atty. Homobono Adaza, nga na-interview sa DYAB Abante Bisaya, di lang gikan sa Malakanyang kon dili gikan gyod sa pamilya ni Presidente Arroyo ang sugo sa pag-wiretap ni Garcillano:

• Ang naghimo sa aktuwal nga wiretapping mao silang T/Sgt. Vidal Doble ug laing upat ka operatiba sa Intelligence Services of the Armed Forces of the Philippines (ISAFP);
• Ang nagsugo nilang Doble mao ang hepe sa ISAFP atol sa eleksiyon nga si Rear Admiral Tirso Danga;
• Ang nagsugo ni Danga mao ang usa ka sakop sa gabinete ni Presidente Arroyo; ug
• Ang nagsugo sa sakop sa gabinete mao ang usa ka sakop sa pamilya ni Presidente Arroyo.

-o0o-

Kon tinuod nga ang pamilya mismo sa presidente maoy nagsugo sa wiretapping, mosamot siya og kaapiki. Kay suma sa gibalikbalik sa mga magbabalaod nga sipsip sa iyang administrasyon, ang pagpaminaw ug pag-record sa mga panag-istorya sa telepono nga way pagtugot sa korte ni pananghid sa mga nag-istorya klarong kalapasan sa Republic Act 4200.

Ang kadunot na sa kadungganan ni Garcillano mahimong makaiban og dyutay sa krimen. Pero ang wiretapping makapatumaw sa mas seryusong pangutana: Kon giunay pag-wiretap sa Malakanyang ang ilang alyado, unsa may garantiya nga wa sila mohimo og mas grabeng kalapasan sa balaod aron pagpangespiya sa ilang mga kaatbang sa politika o karibal nga mga negosyante?

-o0o-

Mao diay nga bisan mas importante ang nasudnong seguridad kay sa iyang personal nga mga interes, nipili si Presidente Arroyo pagtak-om labot sa wiretapping. Pero hangtod kanus-a siyang magtago sa kangitngit? Hangtod kanus-a niya malipat ang katawhan gikan sa kamatuoran?

Karong inanay nang nitakdo ang aktuwal nga mga panghitabo sa mga kasayuran nga nahisgutan sa tulo ka oras nga audio recording, makasugakod pa ba ang presidente sa pagpanalipod sa iyang kaugalingon inig sulpot na sa dugang mga ebidensiya nga wa siya mohunong sa pagmaniobra lang sa eleksiyon aron pagsegurong magpabilin sa gahom nga nakapabuhong pag-ayo sa iyang bana, anak, bayaw ug ubang mga suod? [30]  leo_lastimosa@abs-cbn.com