SUD SA BOLSA
Kon nagsulti sa tinuod si Cebu City Councilor Gerardo Carillo, nideklarar ang Cebu City Council og state of calamity tungod sa pagsaka sa gidaghanon sa mga kaso sa dengue pero wa pa silay klarong plano unsay kahimanan nga pamaliton ug unsay ubang gastohan sa calamity fund sa syudad. Sukwahi ni sa pahibawo ni Cebu City Councilor Christopher Alix nga P4.5 milyones ang ipamalit og mga kemikal ug ibayad sa blood banks.
Bisan kinsay namakak nilang Alix ug Carillo, ang ilang kaubanan sa konseho maoy motumaw nga mga kengkoy. Kay niyangu-yango sila ni Alix o Carillo sa way pagsusi sa katinuod sa ilang mga pagarpar parte sa labing tukmang paagi pagbaraw sa pagkatap sa dengue. Ang resulta? Maayong pagkasud sa mga konsehal sa bolsa sa utok sa paglaktod sa proseso.
-o0o-
Gawas nga kusganong gisupak sa Department of Health ug sa Cebu City Health Department, ang deklarasyon sa state of calamity gihimo nga way rekomendasyon sa Cebu City Disaster Coordinating Council nga gipangulohan ni Carillo. Aron pagtabon sa bulilyaso, pila ka adlaw human sa deklarasyon, gidalidali paghimo ang rekomendasyon ug gipapirma ang mga sakop, ang ubang mga ngan gibuot-buotan na lang gani og pirma sa ubang mga tawo.
Nikumpisal sa DYAB Abante Bisaya si Cebu City Vice Mayor Michael Rama, presiding officer sa City Council, nga giuyonan sa mga konsehal ang deklarasyon human sila pasaligi ni Carillo nga nahingpit na ang tanang panginahanglan. Pero dili si Carillo ray nipasakay nilang Rama ug mga konsehal sa front seat. Kana, kon tinuod ang pangangkon ni Rama nga wa silay labot sa malisyusong maniobra.
-o0o-
Mas dako ang atraso ni Alix. Isip chairman sa committee on health, siya untay kampeyon sa mga panginahanglan sa mga ahensiya nga direktang nahilambigit sa kampanya batok sa dengue, ang Cebu City Medical Center (CCMC) ug City Health. Pero si Alix niisnab sa ilang mga panginahanglan ug niduso sa iyang kaugalingong plano.
Ang CCMC nangayo niadtong Abril og bag-ong blood bank refrigerator kay ang pondong dugo para sa mga pasyente sa dengue gisud rag ordinaryong refrigerator; samtang ang City Health nangayog hematology machine nga paspas nga makatino may dengue bang pasyente. Pero si Alix nagpaugat pagduso pagpalit og minilyon ka pesos nga balor sa kemikal ug sprayers.
-o0o-
Kinsa may constituents nga gisilbihan ni Alix? Ang mga pasyente sa makamatay nga dengue? O ang suppliers sa iyang paboritong mga kemikal ug mga makina?
Gibugoan gyod tingali si Alix sa ubang konsehal. Pila ka buwan nang nilabay, nakumbinser sab niyang City Council pagpamalit sa mga kemikal ug mga makina. Nakugang na lang ang taga City Health pag-abot sa mga himan nga gawas nga wa nila pangayoa di pa gyod maoy labing gikinahanglan sa kampanya batok sa dengue. [30] leo_lastimosa@abs-cbn.com
No comments:
Post a Comment