UWAW SA DENGUE
Kon may uwaw ang mga sakop sa Cebu City Council, angayng ilubong nila sa yuta ang ilang mga nawong. Kay ang gipatawag nga executive session niadtong Huwebes nga gitumong unta pagkumbinser sa mga Sugbuanon nga nahibawo sila sa ilang gihimong pagdeklarar og state of calamity tungod sa dengue nimatuod na man hinuon sa pagduda nga ang mga opisyal nga gitugyanan pag-umol sa mga balaod sa labing dakong syudad sa Sugbo tinuod gyod diayng mga ignorante sa dengue.
Salamat ni Dr. Enrique Tayag, ang pangu sa National Epidemiology Center. Kay di man siya under-the-bunal sa mga konsehal, nakapatuyang si Tayag pag-lecture nila nga way mahimo batok sa mga lamok nga magda sa dengue ang ilang gipanghambog pag-ayo nga mga kemikal ug mist spray machines nga balor og minilyon ka pesos. Ug nga mas epektibo gihapon ang way gasto nga pagpanlimpiyo sa palibot.
-o0o-
Hinaot nga dutlan na sa kauwaw ang mga konsehal ug magsugod na pagtuman sa mga rekomendasyon sa mga ahensiya nga direktang nakigsakbang ug tinuod gyong nasuhito sa dengue. Sama sa Cebu City Medical Center nga dugay na kaayong nangayo og blood bank refrigerator nga kapondohan sa blood bags para sa ilang mga pasyente sa dengue. Sama sa Cebu City Health Department nga nangayo og hematology machine aron mas daling mailhan ang mga pasyenteng may dengue.
Hinaot nga mohunong na silag yangu-yango sa ilang kaubang mga konsehal nga nagsige og hulhog nila pagpamalit og dugang kemikal ug mist spray machines. Hinaot nga di na usbon ang ilang pagkailad pagahin og minilyon ka pesos pamalit sa mga kemikal ug mga makina nga wa magamit kay di makabaraw, hinunoa makapasamot lang hinuon sa pagkatap, sa mga lamok nga nagda sa makamatay nga sakit.
-o0o-
Niay laing bulilyaso si Cebu City Councilor Gerardo Carillo. Nipahibawo siya sa TV Patrol Central Visayas sa niaging semana nga si kanhi Cebu City Health Officer Felicitas Manaloto ang nagpirma sa purchase request pila na ka buwan ang nilabay para sa chemicals nga balor og P2 milyones nga bag-o lang nangabot.
Pero atol sa interview sa DYAB Abante Bisaya niadtong Biyernes, si Dr. Manaloto kusganong nihimakak nga siyay nangayo ug nagpirma sa purchase request. Matod ni Manaloto ang tanang fogging machines ug chemicals nga napalit atol sa iyang pagduma sa City Health department pulos pinalit sa ubang departamento sa City Hall. Nihinumdom si Manaloto nga dihay mga higayon nga ang fogging machines nga para unta sa ilang buhatan gidiretso og hatag sa City Hall ngadto sa mga barangay.
Kinsa may utok sa gipatuyangan nga pagpangompra og chemicals ug sprayers? Limtanon ba lang si Carillo o gidalidali pagduhig si Manaloto aron pagtago sa gidudahang raket? [30] leo_lastimosa@abs-cbn.com
No comments:
Post a Comment