HIGANTENG DAHILI
Usa ka buwan ug upat ka adlaw na ang lapad nga pagdahili sa yuta sa Barangay Mayana sa Jagna, Bohol. Inanay pero kanunay ang paglihok sa yuta nga nagsugod sa sayong buntag niadtong Hulyo 11. Hangtod karon, wa pa ni mopakita og tilimad-on sa paghunong.
Ug way bisan usa sa mga eksperto sa gobyerno, apil nang Mines and Geosciences Bureau sa DENR, nga nakahingpit na sa ilang pasiunang imbestigasyon sa katalagman, nga nakaseguro asa ni kutob ug kanus-a ni mahuman.
Sa labing uwahing ihap, 140 na ka pamilya, o kapin sa 500 ka indibiduwal, ang naapektahan, dul-an na sa 100 ka ektarya ang yuta, kasagaran umahan, nga nangliki ug nidahili ug nahulga nang silingang lungsod sa Duero.
-o0o-
Niadtong Sabado, ang Kapamilya Relief Campaign sa DYAB Abante Bisaya ug ABS-CBN Cebu nga gipangulohan sa among station manager nga si Tata Cinco-Sy, nitungas sa bukid sa Mayana, nga tungod sa iyang kahabog ug katugnaw gitawag og "little Baguio," dala ang mga sinakong bugas, sardinas, corned beef, noodles, mga plato ug ubang gamit sa kusina, sabong humot ug iglalaba, mga sinina ug daghang tambal nga hinabang gikan sa mga Sugbuanon para sa mga biktima sa lisod hisabtan nga katalagman.
Samtang ang himsog nga mga sakop sa naapektahang mga pamilya nagbaguod pagsakwat sa sinakong relief goods, ang masakitong mga kadugo nakapahimus sab sa libreng serbisyo sa medical-dental mission sa mga boluntaryong doktor sa Bohol ug sa Central Command. Ang mga biktima ug ang mas suwerte nilang mga silingan gitudloan sab unsaon paghimo ug pagnegosyo og bukhayo ug puto cheese ginamit ang kalbasa sa mga eksperto sa CSCST ug sa upisina ni Senador Manny Villar.
-o0o-
Gihimo ang relief operations sa kapilya sa Sitio Ilawod daplin sa national highway nga nagsumpay sa Jagna sa ubang kalungsoran. Tungod sa pagdahili, ang highway nahimong dakong bungtod ug di na kaagian. Usa sa mga biktima niingon nga ang iyang bay inanayng gilamoy sa yuta ug gibalhin sa gilay-ong usa ug tunga ka kilometro.
Daghan og mga pangagpas ang mga imbestigador sa gobyerno ug sa pribadong sektor sa hinungdan sa pagdahili: Paghumok sa yuta tungod sa grabeng pag-uwan, pagputol sa mga kainginero sa dagkong punoan sa kahoy, ug paglihok sa yuta nga nagtungtong sa bukid nga anapog kada 100 ka tuig.
-o0o-
Dalayegon ang paspas nga pagtabang sa lokal nga mga opisyal sa Jagna ug sa Bohol. Pero ang mga biktima dunay reklamo batok sa tulo ka nasudnong ahensiya:
· Ang SSS ug GSIS nagdumili paghatag nilag calamity loan; ug
· Ang DepEd nagdumili pagsuspenso sa klase ug pagbalhin sa Mayana Elementary School bisan peligro na para sa mga bata ang pagtabok sa lapad nga luna nga naigo sa landslide. [30] leo_lastimosa@abs-cbn.com
No comments:
Post a Comment