Salamat ni DENR Secretary Mike Defensor, napahinumdoman ang kinabag-an sa katawhan, dihang nag-ungaw na sila nga malumos sa higante ug way kinutobang kampanya sa lipatlipat nga gilusad sa Malakanyang, nga di angayng kalimtan ang Garci tapes. Nga ang tinuod nga isyu sa krisis nga nihamok sa nasud karon mao ang kuwestiyonableng mandato nga gihuptan ni Presidente Gloria Macapagal-Arroyo.
Ug nga kinahanglan unang husayon kining batakang pagduda sa ka-lehitimo sa nasudnong liderato sa di pa maka-irog ang uban pang mga hilisgutanan. Pipila nila lehitimo, sama sa nag-ung-ong nga krisis sa lana ug padayong pagtibugsok sa ekonomiya. Pero kasagaran nila panglawgaw, sama sa charter change ug truth commission.
-o0o-
Klarong dunay bendisyon sa Malakanyang ang makauuwaw nga salida ni Defensor sa niaging semana, sama sa pagwarawara ni Press Secretary Ignacio Bunye sa iyang kataw-anan ug dinalidaling bersiyon sa Garci tapes. Labing dakong ebidensiya nga gitugotan ni Presidente Arroyo ang iyang salida mao ang pagpabilin ni Defensor sa puwesto, sama sa pagpilit ni Bunye sa katungdanan, bisan pa kon managsama nilang nawad-an og ulo.
Samtang wa barawa si Defensor, di tang kapaabot nga suportahan siya sa Palasyo. Igo nang gisalikway si Defensor nga morang way kapuslanang nuog sa mga kongresistang sipsip sa administrasyon. Kay gi-reserba pa si Defensor sa umaabot nga duwa. Samang Bunye, padayon siyang gamiton sa kampanya sa kalibog, sama sa pagpanghagit og pustaanay sa oposisyon pagsumiter og dugang kopya sa Garci tapes ngadto sa US ug ubang kanasuran para sa authentication.
-o0o-
Maong kon dunay igong kabuot ang politikanhong oposisyon, nga sa gusto natog sa dili mao ray bugtong paglaom nga makairog ang impeachment process batok ni Presidente Arroyo, kinahanglang magsugod na sila sa paghimo sa tinuod nga trabaho—ang pagpalig-on sa articles of impeachment pinaagi sa pag-ila sa tanang mga politiko ug opisyal sa gobyerno, pagtultol sa tanang mga lugar ug pagsubay sa tanang mga maniobra pagtikas sa niaging eleksiyon nga nahisgutan sa, may lain pa ba, Garci tapes nga kaniadto rang nanguhit nila.
Pero kon ang mga lider sa oposisyon padayong mag-ilog pag-atubang kamera sa ilang way kinutoban nga press conferences sa labing luhong mga hotel sa Metro Manila, segurong masud sila sa laang sa kampanya sa administrasyon sa pagpamakak ug pagbuak-buak.
-o0o-
Kon mahitabo, wa ni magpasabot nga magpabilin si Presidente Arroyo sa puwesto ug makatiwas sa iyang termino hangtod sa 2010. Mapalagpot gihapon siya sa Malakanyang. Kay ang katarung modaog man gyod batok sa kadaotan.
Pero mausab nang liderato sa pakigbisog. Inay maghangad sa mga politiko sa oposisyon nga otro sang nangalisbo, ang katawhan maoy mangunay pagpasiugda og kausaban nga, hinaot pa unta, di na lang kutob sa mga dagway kon dili apil na sa sistema para sa mas makiangayong ugma. [30] leo_lastimosa@abs-cbn.com
No comments:
Post a Comment