Arangkada for August 2, 2005

 

             PREMYO SA LANGAY

 

Masuk-anong nireklamo si Presidente Gloria Macapagal-Arroyo nga nidangop ang oposisyon sa media sa pagpresentar sa ilang mga saksi seryusong pasangil nga iyang gitikas ang niaging eleksiyon uban sa pakigkonsabo ni kanhi Comelec Commissioner Virgilio Garcillano ubang opisyal sa Comelec ug sa mga heneral ug ubang opisyal sa militar ug kapolisan. Sa makausa pa, ug aron pagpalambo sa iyang kampanya pag-usab sa konstitusyon, gibasol ni Presidente Arroyo ang sistema sa politika nga nagtugot sa iyang mga kaatbang pagpresentar sa ilang mga saksi sa media sa way pagpaabot nga makapanalipod siya sa iyang kaugalingon.

Angayng pakalmahon ang presidente kay di monopoliya sa oposisyon ang kamahiligon nga mogamit sa media, siya mismo ganahan kaayong mopresentar sa media sa dinakpang suspitsadong mga kriminal bisan wa pa sila kapasakai og kaso sa korte, kausa gani nasayop siya pagpresentar sa nagbisto sa anomaliya nga mao ang suspek. Ug aron makaamgo nga ang Cha-Cha di maoy sulbad sa tanang problema, angayng pahinumdoman ang presidente nga federal-parliamentary nga gobyerno di garantiya batok sa iresponsableng mga pasangil.

-o0o-

Pero sa di pa hingpit nga moulbo ang kaspa sa presidente, maayo tingaling susihon nganong napugos ang oposisyon pagpatawag og press conferences aron pagpresentar sa ilang mga saksi, inay magpaabot sa impeachment process sa Kongreso. Ang mga alyado ra sab sa presidente, nga klarong igo ra sang nagtuman sa sugo sa Malakanyang, ang nagkonsabo pagamit sa makabungog nilang mayoriya aron pagbabag sa pagsugod sa proseso.

Kon matinud-anon si Presidente Arroyo sa iyang saad pagpanalipod sa iyang kaugalingon pinaagi sa impeachment, angayng bakwion niya ang script nga gisunod sa iyang paboritong mga itoy sa Kongreso ug pasagdan na lang ang oposisyon nga makasugod pagpresentar sa ilang mga saksi ug mga dokumento atubangan sa House Justice Committee. O mas maayo nga hunungon nang kinamangay aron gawasnon nang mga kongresista nga mopirma sa impeachment complaint ug kasugdan sa labing daling panahon sa impeachment trial sa Senado.

-o0o-

Sa kasamtangan, si Presidente Arroyo di kapugong ni House Minority Floor Leader Francis Escudero pagkabayo sa testimoniya ni Michael Angelo Zoce, nga nagpailang sinaligan ni Lakas Executive Director Joey Rufino, nga nakakita siya sa pagsuburno sa mga opisyal sa Comelec ginamit ang payola sa jueteng sud sa bay ug sinaksihan ni Presidente Arroyo. Labaw nang di siya kapugong ni Escudero nga duna silay laing lima ka saksi nga mopalig-on sa pasangil ni Zoce, puno sa taas na kaayong listahan sa ilang mga saksi.

Pero di inutil ang presidente batok sa sibaw nga mga pasangil sa oposisyon nga gipaagi sa media. Daghan siyang nabayran nga mga sakop sa media ug mga gobernador, mga mayor ug ubang lokal nga mga opisyal. Ug panahon nang maningil siya sa ilang bugti nga serbisyo. [30]  leo_lastimosa@abs-cbn.com