Arangkada for August 30, 2005

 

            ESKANDALO SA CSCST

 

Si Dr. Jose Sal Tan, presidente sa Cebu State College of Science and Technology (CSCST) Main Campus gipasanginlan sa mosunod nga mga anomaliya:

• Pagdawat og P125,000 nga binuwang honorarium isip "resource lecturer" sa 28 ka subjects sa evening classes uban sa iyang paboritong mga opisyal sa eskuylahan;
• Kapakyas pagbayad og income tax sa ilang honorarium nga mas dagko kay sa regular nga suholan;
• Pagtilok sa kita sa CSCST para sa ilang honorarium bahala na kon way nahibiling kuwarta para sa tubig sa mga pansayan, chalk ug eraser sa classrooms ug mga ekipo sa mga laboratoryo; ug
• Paghimo sa eskuylahan nga "diploma mill" pinaagi sa paghatag og doctoral ug masteral degrees sa mga politiko ug mga tagduma sa satellite schools bisan wa mopakita sa klase, kasagaran mas dagko pag grado kay sa tinuod nga mga tinun-an.

-o0o-

Gawas ni Tan, gipasanginlan sang nakadawat sa makabungog nga honorarium ang ubang opisyal ug mga kawani sa CSCST sama nilang Dr. Victor D. Villaganas, Dr. Rodolfo B. Burgos, Dr. Cecilia Elena P. de los Reyes, Geronimo C. Laburada Jr., Dr. Teresita T. Rojas, Atty. Maximo Jumoad, Maximo Limpiado, Corazon M. Soco, Hercules C. Allera, Flordelyn E. Escarda, Josephine Villa, Irwin P. Allego, Aquilino M. Enriquez, Segundino S. Cuadra, Menchu D. Duites, Emma C. Canete, Irma P. Cabarse, Ghierl Matario, Pio Manguilimotan, Clementino Espanol, Luz Loise S. Cuachon, Anne J. Ponce, Mark Lastimosa, Danilo S. Pasaylo ug Gil T. Piramide.

Apil sa ilang gitudloan nga 28 ka subjects mao ang Pre-Elementary, Special Education, Communication Arts Minor/Major/Cognates, Professional Education Weekdays, Master in Special Education, Bachelor of Science in Nursing, Special Education Minor/Major/ Cognates, Bachelor in Secondary Education, Elementary Teaching Strategies, Professional Education Subjects Saturdays/Sundays, Bachelor in Elementary Education Evening, Mathematics Minor/Major/Cognates, Physical Education, Health and Music, Licensure Examination for Teachers Review Classes, Associate in Industrial Technology, Associate in Engineering Technology, ug Bachelors of Industrial Engineering.

Di kay kana ra. Nagnihit na tingali sa mga ngan maong giapil na lang ang mosunod: Saturday/Sunday Program, On-The-Job Training, Requested Subjects, Special Programs ug Crash Program.

-o0o-

Si Dr. Tan dihang na-interview sa Arangkada sa DYAB Abante Bisaya naglisod nag hinumdom pila ka subjects ang iyang gitudloan. Labaw nang naglisod na pagkuwenta pila ang kinatibuk-ang honorarium nga iyang nadawat. Ang makauuwaw niyang pagpagoryo-goryo gihapinan sa pagarpar nga gisubli na ang kamakiangayon sa ilang pagdawat sa dagkong honorarium.

Niangkon si Tan nga gipasagdan niyang mga panginahanglan sa CSCST main campus tungod sa giingong plano ni kanhi Cebu City Mayor Alvin Garcia pagbalhin nila sa SRP. Dihang gipahinumdoman nga di na mayor si Garcia, si Tan nibalitok na sab ug niingon nga wa diay niya hingpit nga pasagdi ang eskuylahan. [30]  leo_lastimosa@abs-cbn.com