Arangkada for August 4, 2005

 

NAANGIN TANAN

 

Usa sa labing dakong kalibogan sa atong panahon: Sa usa ka bahin, nitibugsok ang popularidad ni Presidente Gloria Macapagal-Arroyo ngadto sa 19%, nga maoy labing ubos sukad sa pagsugod sa surveys sa popularity ratings sa mga presidente niadtong 1984, duha ka tuig sa wa pa mapukan ang diktadura ni kanhi presidente Ferdinand Marcos; pero sa pikas bahin, ang mga kongresista nga nipirma sa impeachment complaint wa kaabot og 79, o 1/3 sa mga sakop sa House of Representatives, nga maoy gikinahanglan aron kasugdan sa labing daling panahon ang impeachment trial batok ni Presidente Arroyo sa Senado.

Duha ray posibleng katin-awan:

• Una, sayop ang surveys suma sa pasangil sa Malakanyang, nga lisod toohan kay managsama ang findings sa tanang ligdong nga research organizations, di lang sa lokal nga SWS ug Pulse Asia kon dili apil nang kalibotanong survey groups nga gikuha sa CNN, Time Magazine ug ubang langyawng media organizations; o
• Ikaduha, nga maoy mas katoohan, gipalabi sa mga kongresista ang ilang pamolitika kay sa pagpatigbabaw sa sentimento sa mga botante sa ilang mga distrito.

-o0o-

Sa labing uwahing survey sa Pulse Asia Inc., nga gihimo niadtong Hulyo 2-14 sa tibuok nasud, nitidlom sang popularidad nilang Bise Presidente Noli de Castro (44%), Senate President Franklin Drilon (39%), House Speaker Jose de Venecia (31%) ug Supreme Court Chief Justice Hilario Davide Jr. (31%).

Ang pagtibugsok ni de Castro gibasol sa iyang pagdupa ni Presidente Arroyo, kang Drilon tungod sa giisip nga oportunistang pagtalikod sa presidente, kang de Venecia tungod sa pagpahimus sa krisis pinaagi sa pagduso sa Cha-Cha, ug kang Davide tungod kay igo lang nangiyugpos atubangan sa higanteng eskandalo.

Sa kinatibuk-an, ni-us-os ang pagsalig sa katawhan sa gobyerno tungod sa krisis sa politika ug ekonomiya nga nihakop sa nasud. Pero si Presidente Arroyo maoy di katug nga maghayang. Kon ang imong approval rating mas ubos pa kay sa diktador nga niulipon sa nasud sud sa 14 ka tuig, duna kay seryusong problema.

-o0o-

Tungod sa nagkapuliki nga paningkamot sa mga torotot ni Presidente Arroyo pagsagang sa makalilisang nga testimoniya sa pag-umangkon ni kanhi Comelec Commissioner Virgilio Garcillano ug kanhi kawani sa Malakanyang, makalibog ang ilang sumbalik ni Michael Angelo Zuce:

• Sa usa ka bahin, nipresentar sila og mga saksi nga nipintal ni Zuce nga gawas nga mayukmok rang kawani sa Palasyo daghan pa gyod og utang ug atraso maong di katoohan ang pangangkon nga siyay gitugyanan sa importanteng tahas sa pagtapok ug pagsuburno sa mga opisyal sa Comelec;
• Pero sa pikas bahin, nipresentar sab silag mga saksi nga nipasangil ni Zuce sa pagpangolekta og minilyon ka pesos aron pagsurikbot sa mga protesta sa eleksiyon, tahas nga di mahimo kon tinuod pa siyang mayukmok. [30]   leo_lastimosa@abs-cbn.com