BANGIS NGA BUDHI
Gawas sa iyang pagpirma sa impeachment complaint batok ni Presidente Gloria Macapagal-Arroyo, si Kongresista Clavel Asas-Martinez sa ikaupat nga distrito sa Sugbo, ang usa sa labing suod sa presidente nga naningkamot na karon pagpalagpot niya sa puwesto, aktibong nitabang pagpalig-on sa mga saksi ug mga ebidensiya sa prosekusyon pangandam sa pormal nang pagsugod sa imbestigasyon sa House Committee on Justice sunod semana.
Si Martinez maoy usa sa nagsusi unsa kamapuslanon ang makapakugang nga testimoniya ug mga dokumento ni Michael Angelo Zuce, ang pag-umangkon ni kanhi Comelec Commissioner Virgilio Garcillano ug kanhi kawani sa Malakanyang, sa giingong pagsaksi ni Presidente Arroyo sa paghatag og payola sa jueteng ngadto sa mga opisyal sa Comelec aron pagtikas sa eleksiyon sa niaging tuig.
Iyang rekomendasyon? Ang kalig-on sa mga ebidensiya ni Zuce makapalig-on sa kaso batok sa presidente bisan kon ang saksi mismo nahilambigit sa lapad nga maniobra pagseguro sa kadaogan sa presidente.
-o0o-
Ang mga nasuhito sa kasuod nilang Martinez ug Presidente Arroyo maglisod pagtoo nga si Martinez maoy usa sa mangu sa prosekusyon pagpalagpot sa presidente. Wa modiretso og layat si Martinez ngadto sa oposisyon. Inanay ang pagkausab sa iyang pagtan-aw sa presidente. Pero dihang nakahukom na pagbiya sa administrasyon, wa nang kapugong si Presidente Arroyo bisan kapila pa gipatawag si Martinez sa Malakanyang.
Kasaligan nakong tinubdan niinsistir nga maliso pay buko sa kawayan kay sa baruganan sa mga Martinez pakigbatok nang Presidente Arroyo. Kay may sukaranan si Kongresista Martinez nga makumbinser nga gibukobuko siya sa presidente.
Bisan tuod wa maapil sa Garci tapes giunsa pagmaniobra ang iskutenyo sa Sugbo, parang Martinez ang nabistong direktang koneksiyon sa iyang mortal nga kaaway nga si Gobernador Gwen Garcia ngadtong Garcillano, tungod sa na-wiretap nga tawag sa wa mailhing lalaki nga ni-apura ni Garcillano pagproklamar ni Garcia bugti sa ila nang "gikasabotan" ug sa bisan unsang dugang pang pangayuon sa gidudahang eksperto sa dagdag-bawas "for the boys," maoy di malalis nga pruyba nga nagkatakdo ang hakog nga mga interes nilang Arroyo ug Garcia pagpanikas.
-o0o-
Samang tinubdan nipahibawo nako nga sa wa pang eleksiyon sa niaging tuig, nagduda nang grupo sa mga Martinez nga di tumanon ang pasalig ni Presidente Arroyo nga wa siyay paboran sa tanang lokal nga kandidato sa Probinsiya sa Sugbo nga pulos nisuporta niya. Mayoriya sa ilang mga dumadapig niawhag nila pagtakli sa ilang suporta ngadtong Fernando Poe Jr.
Pero si Kongresista Martinez niinsistir naga magpabilin silang Arroyo. Maong pagkabisto sa Garci tapes, wa kalikayi ang pagbasol sa iyang kaugalingon. Labi nang kon didto pa silang FPJ, duna unta silay kopya sa certificates of canvass ug nababagan unta ang bisan unsang maniobra pagtikas sa iyang banang kandidato pagka gobernador nga si Celestino Martinez Jr. [30] leo_lastimosa@abs-cbn.com
No comments:
Post a Comment