TAPOLAN
Ang politikanhong oposisyon maoy sad-an nganong nagpabilin pa sa puwesto si Presidente Gloria Macapagal-Arroyo hangtod karon. Kay wa silay laing gihimo gawas sa pagtuyok-tuyok pagpangita sa "smoking gun" pagmatuod sa mga pasangil batok sa presidente. Angay silang pukawon sa kamatuoran nga ang presidente nga nakaako paglipat sa katawhan sa iyang pagkawat sa ilang mandato sa niaging eleksiyon di sayon nga palayason.
Human sa sayon kaayong pagdaog sa Edsa 1 ug 2, dako ang tentasyon sa pagpangiyugpos ug pagpaabot lang kanus-a kusion sa iyang konsiyensiya si Presidente Arroyo aron puno sa kauwaw nga manaog sa katungdanan. Ang politikanhong oposisyon, kansang mga panglantaw way kalainan sa mga namunoan nga gusto nilang pulihan, nagtinguha lag kausaban sa mga dagway dili sa pagtugkad sa gamot nga mga hinungdan sa mga problema nga nakapa-unlod ning nasura.
-o0o-
Way bisan usa ka saksi ug way bisan usa ka dokumento nga ikawara-wara sa politikanhong oposisyon nga makakumbinser sa publiko, kansang pagduda sa gipasanginlan gisagolan sab sa samang pagduda sa motibo sa mga namasangil, nga tinuod ang mga krimen nga gipasangil batok ni Presidente Arroyo.
Ang dakong problema sa mga lider sa politikanhong oposisyon, gawas sa kakuwang nilag kaligdong ug panaghiusa, mao nga padayong gikumbinser ang ilang kaugalingon nga mapalagpot nila si Presidente Arroyo sa Malakanyang pinaagi lang sa pagarpar. Di sila ganahan nga maghago. Way bisan usa nga ganahang motrabaho aron aktuwal nga mangita, magtikad ug mopalambo sa mga ebidensiya batok sa presidente.
-o0o-
Kon makahimo pa lang unta sila pagtan-aw lapas sa tumoy sa ilang mga ilong, segurong ilang makit-an nga ang Garci tapes ug ang affidavit ni Michael Angelo Zuce maoy labing adunahang mga giya asa pangitaon ang kaliboan ug usa ka ebidensiya sa lapad nga tikas sa niaging eleksiyon ginamit ang minilyon ka pesos nga payola sa jueteng.
Ang Garci tapes ug Zuce affidavit puno sa mga ngan, lugar ug petsa sa sekretong mga tigom pagtikas sa eleksiyon nga mahimong masusi, matultolan, matino ug mapalig-on. Pero lisod ug kapoy ning buhata. Mas sayon ang pagpatawag sa way kinutobang press conferences.
-o0o-
Sa pikas nga bahin, salamat na lang nga wa dayon molampos ang politikanhong oposisyon pagpalagpot ni Presidente Arroyo. Kay kon mga nawong ra sa mga namunoan ang mausab, sama sa Edsa 1 sa 1986 ug Edsa 2 sa 2001, magdagtom lang gihapon ang kaugmaon ning nasura.
Hinaot nga ang kapakyas sa oposisyon pagtuman sa labing batakang mga gimbuhaton pagpalig-on sa kaso batok sa presidente dunay mas makiangayong resulta: Ang dugang paglaygay sa krisis moseguro nga mas daghang katawhan ang matandog sa eskandalo ug magpakabana pagtingog ug paglihok ug di na itugyan ngadto lang sa mga politiko ang pakigbisog para sa mas malungtarung kausaban. [30] leo_lastimosa@abs-cbn.com
No comments:
Post a Comment