Arangkada for August 7, 2005

 

                NAGKABULINGIT

 

        Hangtod karon, di pa ko kumbinsido sa determinasyon ni Mandaue City Mayor Teddy Ouano pagtapak sa mga buslot sa iyang administrasyon nga maoy hinungdan nga nakalusot ang pagtukod sa labing dakong pabrika sa shabu sa iyang nataran.   Maong pasayloa nga bisan sa tanan niyang pagarpar di pa ko kumbinsido nga hingpit nga inosente ang iyang pamunoan sa eskandalo sa pagpili sa Mandaue isip base sa higanteng sindikato sa ilegal nga drugas.

        Tungod ini, wa ko mahibung nganong morang gisilian nga nagkisikisi pag-ayo ang mayor dihang niangkon ang mga imbestigador nga duna na silay mga ngan sa local contacts ni Calvin de Jesus Tan, ang gipasanginlang financier sa mega shabu laboratory sa Umapad, Mandaue.   Mangahas gani ko pagpangagpas nga nisamot kahasol ang kinatulgan sa mayor dihang gipahibawo ni Kongresista Roque Ablan, tsirman sa House Committee on Dangerous Drugs, nga naapil sa listahan ang dagkong mga politiko.

-o0o-

        Usa sa mga hinungdan sa akong pagduda hain kapusta si Mayor Ouano mao ang taphaw niyang imbestigasyon sa nabisto nga pagpabaya sa mga ahensiya sa Mandaue City Hall pagsusi sa bodega nga gihimong shabu laboratory.  Way bisan usa sa mga ahensiya nga gitahasan unta paghimo og tinuig nga inspeksiyon ang niduaw sa bodega nga, ambot naatol ba lang o mao gyoy hinungdan, gipanag-iya sa pamilyang sikit pa sa ampaw sa pamilya sa mayor.

        Bisan sa abunda ug lehitimong mga sukaranan sa pagduda sa iyang administrasyon, way gihimo ang mayor pagsilot sa iyang department heads nga wa katuman sa ilang trabaho.   Bisan sa buwag nga kamandoan sa Visayas Ombudsman, Department of Interior and Local Governments ug Department of Justice, way klarong imbestigasyon nga gihimo ang mayor sa makauuwawng bulilyaso.

        Labing klarong ebidensiya sa iyang pagpabaya?  Hangtod karon way bisan usa sa masalaypong department heads ang nasilotan.

-o0o-

        Ang taphaw nga imbestigasyon sa eskandalo gisangon ni Ouano ngadto sa otrong taphaw niyang legal officer nga si Rey Heyrosa.   Kinsa nipada og memorandum sa hingtungdang department heads pag-esplikar sa ilang sipyat "…within the period of five" sa way pagklaro kon 5 hours, weeks, days o months ba.

        Maayo na lang kay human sa pipila ka semana, nakahimo gyod og rekomendasyon si Heyrosa pagsuspenso nilang City Engineer Ceferino Ingles ug City Treasurer Lorna Atega.   Ang usa ka semanang suspenso pasiuna lang sa mas komprehensibo nga imbestigasyon sa di pa sila pasakaan og pormal nga mga kasong administratiba.

-o0o-

        Human ko gipasapasa sa mga departamento sa City Hall, akong nahibaw-an nga wa mapatuman sa mayor ang rekomendasyon ni Heyrosa ug wa mapasakai silang Ingles ug Atega og mga kasong administratiba.

        Maong di kapangugat ang mayor nga limpiyo ang iyang kamot.   Bisan kon di pa siya maapil sa listahan sa local contacts ni Tan, magkabulingit gihapon siya sa eskandalo.  [30]    leo_lastimosa@abs-cbn.com