Ang labing epektibong paagi sa pag-alkontra sa dengue mao ang pagpanglimpiyo, dili ang pagdeklarar og state of calamity. Mas epektibong paagi pagpalayas sa mga lamok ang paghabwa sa tanang nagpondong tubig o pagpangita og lutsanan sa nabara nga mga kanal, dili ang pagpangompra og minilyon ka pesos nga balor sa kemikal. Mas daghang kinabuhi ang maluwas pinaagi sa pag-edukar sa mga molupyo sa tukmang mga paagi pakigbatok sa lamok kay sa pagarpar ug salida sa mga politiko aron lang pagtagbaw sa ilang kahigwaos paghilabot sa dakong calamity fund.
Pero ang mga konsehal sa Syudad sa Sugbo nipili sa pagsalida, pagasto og minilyon ka pesos aron pagpalit sa way kapuslanang mga kemikal ug kahimanan, pagdasig sa mga molupyo pagsunod sa ilang ka-ignorante ug, labaw sa tanan, pagrisgo sa mga Sugbuanon, gikan sa labing bata ngadto sa labing tiguwang, sa padayong paghasi sa mga lamok nga nagda sa makamatay nga sakit.
-o0o-
Ang problema sa kampanya batok sa dengue di lang sa Syudad sa Sugbo, nga sa labing uwahing ihap maoy labing daghan og kaso sa tibuok Pilipinas, kon dili sa ubang lugar sa nasud mao ang tokar-tokar nga kakugi sa lokal nga mga opisyal ug mga molupyo pagpanglimpiyo sa mga nataran sa kabalayan nga kasagarang maigo sa dengue. Si Dr. Susana Madarieta, regional director sa Department of Health sa Central Visayas, niangkon nga usa sa posibleng mga hinungdan sa pagsaka sa mga kaso sa dengue karong tuiga mao ang pagkumpiyansa sa mga molupyo ug mga opisyal human sa pag-us-os sa mga kaso sa niaging tuig.
Nga kadasonan sa mga numero sa niaging lima ka tuig. Human sa pagsaka sa mga kaso sa dengue sa unang tuig, naninuod pag-ayong mga opisyal ug mga molupyo pagpanlimpiyo sa ikaduhang tuig. Tungod sa pagtidlom sa mga kaso sa ikaduhang tuig, nangiyugpos na lang maong nisaka na sang dengue sa ikatulong tuig.
Ang subo nga kamatuoran mao nga di makapausab sa atong batasan ang pagahin sa Cebu City Council og P3 milyones batok sa dengue.
-o0o-
Usa ka adlaw human gideklarar sa konseho ang state of calamity, napalit dayon ang mga kemikal ug gisugo dayong mga kawani sa Cebu City Health Department sa pagpasirit ini sa Banawa, Guadalupe ug ubang lugar nga grabe ang dengue. Nikalit ba lag kaabtik ang burukrasya sa City Hall o nakontrata nang daan ang kemikal maong gi-apura ang deklarasyon sa state of calamity?
Ug samtang susihon may subasta bang morang kilat nga pagpamalit sa kemikal, maayo sang pangutan-on ang mga konsehal nganong wa piski og bisan usa ka dako ang mga kahimanan sa Cebu City Medical Center pag-atiman sa mga pasyente sa dengue. Sama sa ilang blood refrigerator nga dugay nang guba ug gihimo na lang butanganan sa mga dokumento. [30] leo_lastimosa@abs-cbn.com
No comments:
Post a Comment