LAWOG SA TIRONG
Gibunyagan sa gobyerno ang overseas Filipino workers (OFWs) nga "bag-ong mga bayani." Pero way gihimo ang gobyerno pagpanalipod nila gikan sa bakak nga mga pasalig ug tulis sa placement fees sa recruitment agencies hangtod sa way kukaluoy nga pagwatas-watas sa ilang mga kontrata inig abot na sa ilang mga destinasyon.
Labing uwahing mga biktima mao ang OFWs, nga nag-apil og mga Sugbuanon, nga gipangulata sa Taiwan tungod sa ilang pagreklamo sa paglapas sa mga kontrata nga ilang gipirmahan. Sama sa naandan, way nahimo pagpanalipod nila ang Manila Economic Council (Meco) sa Taipei. Ang OFWs napugos pagasto sa ilang nihit nga hiniposang kuwarta para sa plitehan sa ayroplano aron nga di katiwasan sa bagis nga mga langyaw.
-o0o-
20 ka OFWs ang nangadto sa Taiwan aron pagtrabaho sa usa sa labing dakong kompaniya sa Taichung niadtong Hunyo. Tam-is kaayong pasalig nga ilang nadawat gikan sa employment agency nga gitugotan sa Philippine Overseas Employment Administration (POEA) pagpanguha og mga trabahante sa Sugbo ug ubang bahin sa nasud.
Uwahi na dihang nadiskubrehan sa OFWs nga dakong bakak ang suweldo ug mga benepisyo nga gipasalig sa recruiter. Inay sa gipasalig nga P41,000 ang buwan, P13,000 ray nadawat sa ilang mga pamilya tungod sa way kinutobang kapon sa ilang brokers. Ang mga trabahante gilumpong morang sardinas sa usa ka kuwarto ug gipakaon daplin sa dan.
-o0o-
Ang ilang reklamo ngadto sa Overseas Workers Welfare Administration (OWWA) sa Taiwan way nahimo. Diha na nanglihok ang taga OWWA human sa pagbiya sa OFWs sa ilang mga trabaho sud sa usa ka adlaw.
Bisan pa, napakyas ang OWWA pagpa-arang-arang sa ilang kahimtang sa panarbaho. Hangtod nga sa niaging semana, gipugos ang OFWs pagpapirma og kontrata nga Ininsek nga way hubad nga Iningles. Ang OFWs nga nibalibad kay wa kasabot gibukbok pag-ayo sa bagis nga goons sa broker.
Ang mayoriya nga napugos pagpirma nakahukom nga mamauli sa Pilipinas sa labing daling panahon tungod sa kahadlok nga silay isunod pagbukbok. Gida ang nabun-og nilang mga kauban, apil nang duha nga tungod sa kagrabe sa samad gipakanaog atol sa stopover sa ayroplano sa Hong Kong.
-o0o-
Dihang gipaubos nang OFWs sa custody sa OWWA sa Manila, gihudlat sila sa recruiter nga kon mokiha, dugay nga mahusay ang kaso, dako ang ilang gasto ug mahimong ma-blacklist pa gyod sa ubang placement agencies. Wa gyod mobaraw ang OWWA dihang gitanyagan silag areglo bugti sa pag-uli sa nabayad nga placement fee ug paghatag sa usa ka buwang suholan.
Kon ang mga ahensiya nga gitahasan pagpanalipod sa OFWs tua kapusta sa pikas, unsa man intawoy dag-anan sa atong mga kapamilya sa ubang kanasuran? Tinuod bang gitawag silag mga bayani kay dako ang kahigayonan nga mangamatay? [30] leo_lastimosa@abs-cbn.com
No comments:
Post a Comment