WALDAS SA BUHIS
Samtang gilalisan pa wa bay nalapas nga balaod sa misteryusong transaksiyon tali ni Pres. Arroyo ug sa Venable LLP, ang langyawng kompaniya nga gitahasan pagkumbinser sa Estados Unidos pagsuporta sa charter change, duha ka eskandalo ang nabisto nga lisod sagngon sa Malakanyang:
- Una, ang pagasto og kapin sa P100 milyones sa nagkalainlaing kontrata uban sa langyawng lobby groups taliwa sa kampanya sa pagdaginot tungod sa higanteng alkanse sa budget; ug
- Ikaduha, ang pagsuway ni Arroyo pagtago sa kuwestiyonableng mga transaksiyon gikan sa publiko, ug bisan sa iyang mga alyado ug mga sakop sa gabinete.
-o0o-
Gibisto ni Sen. Ralph Recto ang way tihik-tihik nga pagwaldas sa kuwarta sa Pilipinas para sa wa-ipahibawo-sa-katawhan nga mga transaksiyon sud sa tulo ka tuig sukad sa paglingkod ni Arroyo sa Malakanyang niadtong 2001:
- 2001: $550,290
- 2002: $1,410,235
- 2003: $332,286
Wa pa ni labot sa gikahadlokang mas dakong gasto sa
Malakanyang pagpahumot ni Arroyo sa eleksiyon sa 2004 ug sa pagpanagang sa Gloriagate scandal karong tuiga. Kon Malakanyang ang saligan, di mahitabong ilang itug-an ang mga transaksiyon uban sa langyawng mga torotot nga ilang gisudlan. Sa US Senate ug US Justice Department nakuha ni Recto ang listahan sa walo ka langyawng lobby groups nga nabuhong sa kuwartang siningtan sa pordoy nga Pilipinhong mga magbubuhis:
- Fasturn Inc.;
- Icon Group;
- Patton Boggs LLP;
- Bennerman and Associates;
- Burson-Martseller;
- Crowell and Moring International;
- Maria Luisa M. Haley; ug
- Rhoads-Weber Shandwick Government Relation.
-o0o-
Si Ellen Tordesillas sa Philippine Center for Investigative Journalism (PCIJ) dunay laing expose: Ang pag-usab-usab sa sinultihan, linihokan ug sininaa ni Arroyo dihang niulbo ang mga pasangil nga iyang gigamit ang minilyon ka pesos nga payola sa jueteng pagtika sa niaging eleksiyon di diay libre, $2 milyones ang gibayad sa palasyo para sa Burson-Martseller.
Tungod sa kadako sa bayad, wa katingog si Arroyo dihang giprangkahan sa langyaw niyang mga torotot sa mosunod niyang mga depekto:
- Kumbinsido ang kinabag-an sa katawhan nga di siya matinud-anon;
- Wa siyay bisan gamay na lang charisma; ug
- Ang iyang paglingiw sa mga eskandalo sa iyang bana.
-o0o-
Napugos pagtuman si Arroyo sa mahalon kaayong tambag sa mga langyaw, ang pagsalida ngadto sa katawhan sa iyang mga alas aron nga mabawi ang pagtidlom sa iyang popularidad:
- Gipasige og atubang sa media ang iyang anak, si Luli, nga giisip nga but-an ug ligdong;
- Gibombardiyohan pagpahinumdom ang publiko sa iyang pagka ekonomista;
- Nagsige siyag hisgot sa iyang amahan nga si Diosdado Macapagal; ug
- Gibabad hastang iyang apo nga si Evie, anak nilang Dato ug Kakai Arroyo. [30] leo_lastimosa@abs-cbn.com
No comments:
Post a Comment