Unang nahibaw-an sa Visayas Ombudsman ang gikuwestiyon nga pagbahin-bahin sa mga opisyal sa Cebu State College of Science and Technology (CSCST) sa makabungog nilang honorarium, nga ang gidak-on, panggunit mo sa lingkoranan, hangtod kalima pil-on ang ilang naandang suholan, dihang gi-imbestigar ang buwag nga pasangil sa kahiwian sa satellite school sa isla sa Camotes. Matod ni Visayas Ombudsman Director Virginia Palanca-Santiago nga, gawas sa orihinal nga problema sa Camotes, nangreklamo sab ang mga magtutudlo nga, samtang gagmay kaayong ilang suholan sa pagduma sa evening classes, makapalurat sa mata ang gidak-on sa honorarium nga gidawat sa mga opisyal sa eskuylahan nga wa maghago pagtudlo sa mga klase og bisan usa ka gutlo.
Pormal nang giawhag ni Santiago si CSCST President Jose Sal Tan sa pagsubli sa kuwestiyonable nilang sistema. Pero silang Tan ug ubang nabuhong nga mga opisyal niinsistir sa pagpadayon pagdawat sa eskandaluso nilang honorarium.
-o0o-
Ang kontrobersiyal nga pag-angkon nilang Tan ug ubang mga opisyal sa labing dakong bahin sa bayad sa kabos nga mga tinun-an sa evening program dugayng nabisto tungod sa ilang pag-ulog-ulog pagpisik sa gagmitoyng mumho sa dakong puntil ngadto sa ubang mga kawani sa eskuylahan. Gani, karong nabisto nang ilang kamapahimuslanon, gigamit na man sab nilang mga magtutudlo isip mga pahoy ug mga torotot pagtabon sa higanteng binuang.
Ang labing dagkong mga opisyal sa CSCST nga gipangulohan ni Tan maoy labing dakog nadawat isip "resource lecturers" o "professors." Pananglitan sa kaso ni Tan, gipasanginlan siyang nakadawat og hangtod sa P125,000 ang buwan, patong sa iyang naandang P27,281 nga binuwang suholan. Ang ilang pinanalabi nga mga kawani nabuhong sab sa makabungog nga honorarium.
Ug aron di mopiyait ang ordinaryong mga kawani, gisaboran sab sila og ginagmayng honorarium isip "teaching assistants." Naapil ning maong kategoriya ang guidance coordinator, cashier, auditor, budget officer, security coordinator, payroll maker ug bisan ang mga panday.
-o0o-
Ang tinuorayng biktima ning maong pahimus mao ang mga tinun-an, nga napugos pag-eskuyla sa gabii tungod sa labihang kawad-on. Bisan silay nagbuhi sa evening program, sila ang kinauwahian nga nakadawat sa mga benepisyo. Hastang batakang mga panginahanglan sa ilang classrooms ug laboratories, apil nang tubig sa mga pansayan, gipasagdan nilang Tan ug kaubanan.
Hinaot nga mabadlong sa labing daling panahon, sa Ombudsman ug sa ubang ahensiya nga gidangpan sa nagpakabana nga mga magtutudlo ug mga tinun-an, kining higanteng raket sa CSCST. Hinaot nga inay mopalusot ug magpapating, tumanon na nilang Tan ug kaubanan ang Department of Budget and Management ug Commission on Audit nga nideklarar nga:
§ Ang teaching personnel di kahatagan og honorarium sa mga klase nga wa nila kasehi; ug
§ Ang non-teaching personnel di kahatagan og honorarium ni overtime pay, kon mag-overtime sila hatagan lang og dugang time/days off. [30] leo_lastimosa@abs-cbn.com
No comments:
Post a Comment