LACSON SUSPEK?
Si Sen. Panfilo Lacson ang usa sa tulo ka opisyal sa gobyerno sa Pilipinas nga gipasanginlang maoy nakadawat sa sekretong mga dokumento nga nakuha sa giingong pagpangespiya sa duha ka Pinoy nga naposasan ug nakiha na sa Federal Bureau of Investigation. Silang Michael Ray Aquino, 39, batabata ni Lacson, ug FBI analyst Leandro Aragoncillo, 46, naturalized US citizen, giingong nasakpan nga nagpayuhot og classified nga mga dokumento sa FBI labot sa krisis sa politika sa Pilipinas.
Si Aragoncillo nasakpan sa modernong teknolohiya sa paniktik sa FBI nga nipasa sa sekretong mga dokumento ngadto ni Aquino gikan sa Pebrero hangtod sa Agosto ning tuiga, kanus-a nisulbong pag-ayo ang Gloriagate scandal sa Pilipinas, pinaagi sa text messages sa cellphone ug e-mail messages pinaagi sa Hotmail ug Yahoo.
-o0o-
Wa ilha ang tulo ka opisyal sa Pilipinas nga napadad-an sa classified nga mga dokumento. Pero gidudahan nga ang mga dokumento maoy tinubdan sa pagbisto ni Lacson ug sa ubang lider sa oposisyon nga ang US government mas unang nahibawo kay sa atong mga politiko sa giingong panag-istorya sa telepono nilang Presidente Arroyo ug kanhi Comelec Commissioner Virgilio Garcillano.
Samang mga dokumento ang gitoohang tinubdan sa kasayuran sa kaandam sa FBI pag-authenticate sa Garci tapes atubangan sa pagkuwestiyon sa Malakanyang sa katinuod sa recording. Pero sa kapulihay wa na manghilabot ang FBI kay ang oposisyon ug ang Malakanyang niuna pagdangop sa ubang mga eksperto sa Australia, New Jersey ug Texas.
Si Lacson man o dili ang utok sa nabulilyasong operasyon klarong gitumong ni sa paglili sa mga kasayuran nga nahipos sa FBI nga posibleng maka-influencia sa administrasyon ni US Pres. George Bush Jr. pagbakwi sa suporta parang Pres. Arroyo.
-o0o-
Silang Aquino ug Aragoncillo gipriso nga way piyansa. Matod ni US Attorney Christopher J. Christie samtang ang pagpangespiya wa mahilambigit sa terorismo, tinud-on pagukod ang mga dinakpan kay ang ilang krimen nakabuslot sa nasudnong seguridad sa US.
Nasakpan si Aragoncillo sa FBI dihang iyang gikumbinser ang mga opisyal sa imigrasyon paglugway sa visa ni Aquino nga dugay nang napupos. Human gi-alerto sa imigrasyon, gilusad dayon sa FBI ang audit sa computer activities ni Aragoncillo. Nagduda si Christie nga si Aragoncillo klarong nanguwarta ug nisuporta sa pamolitika sa mga nibayad sa iyang serbisyo.
-o0o-
Bisan wa pang mga dokumento sa FBI, naklarong managlahi ang baruganan sa mga opisyal sa US tungod sa pagsaway sa mga opisyal sa US embassy sa Manila batok sa Malakanyang bisan kon ang opisyal nga baruganan sa Washington mao ang pagsuporta ni Presidente Arroyo.
Pero kay wa man kabuylo ang pagpresentar sa mga ebidensiya sa giingong pagtikas sa niaging eleksiyon ginamit ang payola sa jueteng, wa dasiga sa US ang kampanya pagpalagpot ni Arroyo sa palasyo. [30] leo_lastimosa@abs-cbn.com
No comments:
Post a Comment