LUSOT SA RP
Inay mo-distansiya ni Michael Ray Aquino, ang kanhi polis nga iyang batabata nga nadakpan sa Federal Bureau of Investigation (FBI) sa giingong pagpangespiya batok sa Estados Unidos, si Sen. Panfilo Lacson, gawas nga niangkon nga nakadawat og mga dokumento gikan ni Aquino, nanalipod pa gyod sa kalihokan ni Aquino sa US pinaagi sa pagtawag niyang "patriot" sa kampanya pagbisto sa mga anomaliya sa administrasyon ni Presidente Gloria Macapagal-Arroyo.
Ang Be Not Afraid (BNA) movement nga gipangulohan ni Lacson nipasangil pa gani nga nakigkonsabo ang US sa administrasyong Arroyo pagsikop ni Aquino sa adlaw sa pag-abot sa presidente sa United Nations. Nisumbalik pa gani ang BNA pagpasangil sa US nga maoy nangespiya sa kalihokan sa mga Pilipinhon tungod sa pag-angkon sa FBI nga duna silay sekretong mga dokumento sa krisis sa politika sa Pilipinas.
-o0o-
Pero lisod duphan ang kalihokan ni Aquino sa US. Gawas nga nagtagutago gikan sa mga kasong kriminal nga iyang giatubang sa mga korte sa Pilipinas, si Aquino ilegal sab nga nagpuyo sa US kay dugay nang napupos ang iyang visa. Samtang di hingpit nga ikasalikway ang kahigayonan nga nagkonsabo ang US ug ang administrasyong Arroyo, ug bisan unsa pa ka-lehitimo ang plano ni Aquino pag-apil sa mga protesta batok ni Pres. Arroyo sa UN, suma sa gipatoo sa BNA, mosamot lang kaapiki si Lacson kon panalipdan ang raket ni Aquino.
Sa pikas nga bahin, hilas sab paminawon ang Malakanyang sa ilang pasalig nga himoon ang tanan aron kapanalipdan ang mga katungod ni Aquino. Wa na kinahanglana nga tagoan pa sa administrasyon ang nag-awas-awas nilang kalipay ning pagkasikop na gyong Aquino. Mas matinud-anon ang mga alyado sa presidente nga mag-ambak-ambak sila sa kadalanan sa New York pagsaulog sa pagkatanggong sa usa sa labing sinaligan sa mortal nilang kaaway.
-o0o-
Pasiunang mga detalye sa pagkasikop ni Aquino ug Leandro Aragoncillo, ang Pinoy nga kawani sa FBI, nagpakita sa dakong kalainan sa kaligdong sa mga ahensiya sa gobyerno sa US kon itandi sa mga ahensiya sa Pilipinas. Kon ang Buro sa Imigrasyon pa sa Pilipinas ang gitawag labot sa napupos nang visa sa usa ka langyaw, mas dako ang kahigayonan nga katabonan ang ilegal nga pagpabilin sa langyaw dinhi sa ato, inay nga manawag sa labawng mga opisyal sa ahente nga nigamit sa ngan sa ahensiya.
Kon ahensiya pa sa Pilipinas ang gisumbongan sa kadudahang kalihokan sa ilang ahente, mas dako ang kahigayonan nga gawas nga duphan sa mga labaw ang suspek makig-away pa sa mga nagduda, inay tinud-on pag-imbestigar sa usa sa labing pinangga nilang ahente.
Sa US, gipriso ang mga nisuway lang pagpalusot og visa; sa Pilipinas, gipalusot ang presidente gipasanginlang nanikas sa eleksiyon ginamit ang payola sa jueteng. [30] leo_lastimosa@abs-cbn.com
No comments:
Post a Comment