Arangkada for September 19, 2005

 

       MAS SUWERTE

 

       Nangayog pasaylo si Ted Failon, anchor sa TV Patrol World sa ABS-CBN, ngadtong Ray “Boom-Boom” Bautista tungod sa kapakyas sa nasudnong gobyerno pagpasidungog sa Bol-anong boksidor human sa iyang pagdaog sa Staples Center sa Los Angeles, California sa Estados Unidos.  Matod ni Failon angay untang pasidunggan sab si Boom-Boom sama sa mas inilang boksidor nga si Manny Pacquiao.

       Ang sentimento ni Failon, nga Bisaya, wa dasoni sa mga opisyal sa Metro Manila.  Ilang giisnab ang pag-abot ni Boom-Boom.  Ug bisan human sa init nga paghangop sa mga Sugbuanon ug mga Bol-anon, wa sila moluwat og bisan uwahi na ug ulog-ulog na lang nga pahalipay.

       Si Boom-Boom, 19, nipakita hinuon sa kahinog na sa iyang kabuot.  Matod niya igo nang nahisgutan ang iyang ngan sa mensahe ni Pres. Arroyo human sa ilang sangka.  Pero mas suwerte gihapon siya kay ni Pacquiao:  Giatiman ang tanan niyang panginahanglan ug wa tikasa ang iyang kuwarta sa iyang manager nga si Antonio L. Aldeguer; ug nagtugkad pang iyang mga tiil sa yuta.    

-o0o-

       Di diay monopoliya sa mga opisyal sa Cebu State College of Science and Technology (CSCST) ang pagdawat og honorarium patong sa ilang naandang mga suholan.  Ang banner story sa The Freeman nga sinuwat ni Rene Borromeo gahapon nagpakita nga nasakpan sab sa Commission on Audit (COA) ang samang kalapasan sa mga opisyal sa National Economic and Development Authority (Neda) ug bisan sa ahensiya nga maoy naglatid sa mga lagda sa pagdili, ang Department of Budget and Management (DBM).

       Ang kalainan lang mao nga (1) ang honorarium nga gidawat sa mga opisyal sa CSCST mas dako kay sa ilang naandang suholan; (2) mas dako ang kinatibuk-ang kantidad sa kuwarta nga ilegal nga gikolekta sa mga opisyal; ug (3) ang pasangil nga nagdawat silag honorarium sa mga posisyon nga wa nila serbisyohi, mahimo ganing gituyo lang paghimo ang mga posisyon aron mapasamot pagpaburot ang ilang mga bolsa.

-o0o-

       Dakong insulto ngadtong DBM 7 Director Carmela Fernan ang findings sa COA nga ilegal ang iyang pagkolekta og P5,700 nga honorarium isip sakop sa regional project monitoring committee sa Regional Development Council (RDC 7).  Kay sa tanang opisyal nga gisugo sa COA pag-uli sa ilang honorarium, siyay labing suhito sa mga probisyon sa DBM Circular 2005-3 nga giluwatan niadtong Septiyembre 26, 2003.

       Mas dako ang honorarium ni Romeo Escandor (P6,000), kinsa gitangtang pagka direktor sa Neda 7 human pasanginli nga nagbinastos sa babaye niyang mga kawani.  Di hinuon kong kapasalig nga madutlan si Escandor sa kauwaw ning labing bag-o niyang bulilyaso.  Kay nagpabaga man gihapon siyag lingkod sa regional wage board bisan natangtang na sa posisyon nga maoy gibasehan sa iyang pagkatudlo sa board.  [30]   leo_lastimosa@abs-cbn.com

---

Yahoo! for Good
Click here to donate to the Hurricane Katrina relief effort.