SYUT TANG TANAN
Maayo natong pagkasud sa bolsa. Di lang kitang ordinaryong mga molupyo. Kon dili hastang dagkong mga politiko ug mga negosyante. Apil na ganing mga obispo.
Nitoo tang tanan sa pasalig ni Presidente Gloria Macapagal-Arroyo nga di siya mokanaog sa katungdanan kay iyang tubagon ang mga pasangil nga iyang gigamit ang payola sa jueteng aron pagtikas sa eleksiyon sa niaging tuig pinaagi sa impeachment proceedings sa Kongreso. Nakumbinser ta nga di mamugos sa iyang resignasyon aron kahatagan siyag higayon pagpanalipod sa iyang kaugalingon.
Pero natinuod ang dako natong kahadlok: Nga ang presidente, human nakigkonsabo sa jueteng lords ug sa mga kukhan nga tiglubag sa eleksiyon, mohimo sa tanan aron pagluok sa kamatuoran.
-o0o-
Pagsugod pa lang gani sa impeachment proceedings sa House Justice Committee, ang mga kongresista sa administrasyon hingpit nga nisandig sa ilang mayoriya aron pagpamugos sa mga maniobra nga makaribal sa labing salawayon nga mga paugat sa nangalisbong kasaysayan sa politika sa nasud. Inay hatagan og higayon ang mga namasangil pagpresentar sa ilang mga saksi ug ebidensiya aron matubag ni Presidente Arroyo, ang mga kongresista nga klarong under-the-bunal sa Malakanyang, matinud-anong nisunod sa script pagsabotahe sa proseso:
§ Namugos sila sa ilang katungod pagpili sa pasangil nga tubagon sa presidente;
§ Ilang gipili ang labing huyang sa tulo ka impeachment complaints nga gipasaka; ug
§ Wa pa gani kabawi ang publiko sa ilang kakurat sa papating sa mga kongresista, gibasura dayon ang kaso nga ilang napilian.
-o0o-
Sa ato pa, kon di kapugngan ang binuang nga salida sa administrasyon, mabasura ang tulo ka impeachment complaints tungod lang sa technicality. Bahala na kon wa idili sa mga lagda, ug modako untang kahigayonan nga mapatigbabaw ang kamatuoran, kon gitugotan pang mahiusa ang tanang pasangil aron matingob pagtubag sa presidente, ug mapapas ang tanang pagduda sa ka-lehitimo sa iyang mandato.
Ang presidente nga nangahas pagamit sa ngan sa Ginoo aron pag-insistir nga lunsay ang iyang kadaogan sa niaging eleksiyon, kansang mga torotot niinsistir nga ang tanang mga saksi sa oposisyon binayran ug bakakon ug ang ilang mga ebidensiya minao-mao, wa gyod diay bisan gamay na lang pagtahud sa proseso nga kanunayng gihapin sa iyang pagpamugos pagpabilin sa katungdanan.
-o0o-
Karong na-syut na tang tanan sa bolsa, igo na ba lang tang maglingu-lingo, mangiyugpos ug magpakahilom? O mosuki, mokisikisi ug manlimbasog paglingkawas sa laang nga atong nasudlan?
Nagpabiling kalma ang katawhan atubangan sa pakauwaw sa administrasyon tungod sa saad sa mas malinawong resolusyon nga gisaad sa impeachment proceedings ug sa kakuwang og kaligdong sa mga nangu sa kampanya pagpalagpot sa presidente.
Tungod sa bastos nga pagluok sa impeachment complaints, ang katawhan mahimong mapugos paghangop sa mga solusyon nga di hingpit nga malinawon ug mga lider nga di hingpit nga ligdong. [30] leo_lastimosa@abs-cbn.com
No comments:
Post a Comment