PABAGA WAY SAMA
Human nilampos pagluok sa impeachment complaint batok niya sa Kongreso, ug human nakapanagang sa mga ebidensiya sa giingong pagtikas niya sa niaging eleksiyon ginamit ang payola sa jueteng sa way pagtarung og tubag sa bisan unsang pasangil batok niya, si Pres. Arroyo nihukas na sa tanang kaikog ug panagana sa paglusot sa lab-as nga mga kontrobersiya nga nihamok sa iyang pamunoan. Usa na ini, ug ang labing uwahi, mao ang yano ug sayon kaayo nga pagkanselar sa kuwestiyonableng kontrata nga iyang gisudlan uban sa Venable LLP, ang lobby group sa Washington D.C. nga gitahasan sa pagpangayog kuwarta gikan sa Estados Unidos para sa kausaban sa konstitusyon ug sa sistema sa gobyerno sa Pilipinas.
Sa way pagpasabot nganong nakalusot ang transaksiyon bisan way kasayuran ang labing suod niyang mga sakop sa gabinete ug mga alyado sa Senado ug sa House of Representatives, aroganteng gideklarar sa presidente nga di na siya manubag og bisan unsang pangutana kay giisip nga hingpit nang natak-opan ang kaso human sa pagkanselar sa kontrata.
-o0o-
Ang dinalidali nga pagsalibay ni Pres. Arroyo sa kontrata sa Venable LLP way kalainan sa iyang pagbasura morang nangalisbo nga nuog sa makauuwaw nga salida ni Press Secretary Ignacio Bunye pag-doktor sa Garci Tapes ug pag-angkon nga iya sa presidente ang tingog recording; pagtumaw sa chief of staff ni Kongresista Ignacio Arroyo nga nangangkon nga maoy "Gary" nga ka-istorya sa presidente; kataw-anan nga pagpresentar ni Ilocos Sur Governor Chavit Singson sa klarong gi-doktoran nga tape recording ni kanhi presidente Joseph Estrada sa giingong plano pagpalagpot ni Pres. Arroyo sa katungdanan; ug desperadong paglubag sa finding sa usa ka Amerikanhong eksperto sa way klarong bahin sa Garci tape nga ilang gisumiter sa laboratoryo sa Texas.
Human tagsa-tagsang napamatud-an nga pulos bakak ug maniobra ang mga sumbalik sa administrasyon sa seryusong mga pasangil batok sa presidente, gipadaplin ang nabuko nga mga pangangkon nga morang wa lay nahitabo. Wa bakwia ang iresponsableng pagpamutang-butang, wa mangayog pasaylo sa ilang binuang ug way garantiya nga di na nila usbon.
-o0o-
Bisan abtik kaayong ni-distansiya sa iyang kaugalingon gikan sa pinadaylang nga pamakak sa iyang mga torotot, ug bisan gipalabwan pang kadako sa planggana nga gigamit ni Pilato pagpanghunaw sa bangis nga krimen sa di makiangayong pagluba ni Kristo sa karaang panahon, klaro ang mga ebidensiya nga si Pres. Arroyo ang tinuod nga utok sa maniobra, ug nga ang tuyo mao ra gyod ang paglibuglibog sa publiko.
Gipabilin niya sa puwesto ug sikit pa sa ampaw sa Carcar silang Bunye, Singson, DENR Secretary Mike Defensor ug ubang mga batabata nga nabulilyaso. Susama ra nga giingnan nila ang katawhan nga, "kay wa man mo mailad karon, tingalig sa sunod." [30] leo_lastimosa@abs-cbn.com
No comments:
Post a Comment