Arangkada for September 21, 2005

 

       P1.2B NGA ABUSO

 

Dihang among gipangutana ang mga tigpaminaw sa DYAB Abante Bisaya angay bang ilubong ang patayng lawas ni Ferdinand Marcos sa Libingan ng mga Bayani, nisupak sila ug nipasabot nga di bayani ang diktador nga nipahamtang og martial law ug nanamastamas sa demokratikanhong mga institusyon sa nasud. Pero pipila nila niingon nga bisan unsa pay mga abuso nga nahimo ni Marcos angay gihapon siyang pasidunggan tungod sa daghang mga proyekto nga napasiugdahan sa 21 ka tuig niyang pamunoan.

Ang mga nisuporta ni Marcos niingon nga kon itandi sa mga presidente nga nibanos pagduma sa Malakanyang—silang Corazon Aquino, Fidel Ramos, Joseph Estrada ug Gloria Macapagal-Arroyo—mas daghan gihapon og nahimo ang iyang diktadura. Kon wa pa mong kabantay, way kalainan ang sinultihan sa mga niawhag nga pasayluon na si Marcos tungod sa iyang ka-maayong laki sa mga nangugat nga kalimtan na lang ang pasangil nga nanikas si Pres. Arroyo sa niaging eleksiyon ginamit ang minilyon ka pesos nga payola sa jueteng kay way laing takos nga makapuli niya.

-o0o-

Niay makapakugang nga kasayuran sa laing posibleng abuso sa administrasyong Arroyo: Nasobrahan og P1.2 bilyones ang gasto sa gobyerno para sa intelligence sa niaging duha ka tuig. Matod ni Sen. Ralph Recto ang pinatuyangang pagasto sa intelligence fund mas dako pa kay sa anomalusong kontrata uban sa Venable LLP, ang lobby group sa Washington nga gitahasan pagpangayo og kuwarta sa Estados Unidos para sa charter change (cha-cha).

Nakapait kay confidential ang intelligence fund. Ug kay sekreto man, labihan kalisod nga subayon. Nipasangil si Recto nga gipahimuslan ning Pres. Arroyo di lang sa pagpaburot sa pondo kon dili sa pagamit sab ini para sa laing katuyoan. Gikahadlokang may sukaranan ang pagduda nga ang intelligence funds apil sa abundang mga tinubdan sa kuwarta sa mga magbubuhis nga gigamit pagsuburno sa mga kongresista ug mga sakop sa media aron paglawgaw sa impeachment sa presidente.

-o0o-

Nabisto ang higanteng anomaliya tungod sa dakong kang-a nga nakit-an sa Commission on Audit (COA) tali sa confidential ug intelligence funds nga gigahin sa Kongreso pinaagi sa general appropriations act (GAA) ug sa kantidad nga aktuwal nga gigasto sa administrasyon:

• Sa 2003, ang gahin P1.225 bilyones pero ang gigasto niabot og P1.555 bilyones, sa ato pa, nasobrahan og P330 milyones o 27%; ug
• Sa 2004, ang gahin P1.225 bilyones pero ang gasto niabot og P2.062 bilyones o 69%, nasobrahan og P837 milyones.

Matod ni Recto nga tungod sa COA report

klarong giilad sa Malakanyang ang mga kongresista ug mga senador sa ilang pangangkon sa gisugyot nga nasudnong budget para sa sunod tuig 2006 nga ang confidential ug intelligence expenses niabot lag P1.885 bilyones sa 2004. [30]  leo_lastimosa@abs-cbn.com