Arangkada for September 22, 2005

 

        CSCST NIKAKAK

 

        Ang mga opisyal sa Cebu State College of Science and Technology (CSCST), nga maoy sentro sa nabistong eskandalo sa pagdawat nila og makabungog nga mga honorarium sa hinimu-himo nga mga posisyon nga wa nila serbisyohi, nipada og mga representante pagpahibawo nako nga gusto silang makigtagbo nako sa gawas sa sibyaanan.   Gipasabot nako sila nga di ko ganahang makigtagbo sa mga opisyal sa gobyerno nga nahisgutan sa akong programa gawas sa announcer's booth sa DYAB Abante Bisaya.

        Gidapit nako sila pagtambong sa programang "Arangkada" kay akong igahin ang tanan nakong oras pagpaminaw sa ilang mga tubag sa seryusong mga pasangil batok nila.   Nisugot ang mga opisyal pagduaw nako sa Miyerkules sa buntag.  Pero pila ka oras sa wa pa magsugod ang programa, gipahibawo ko sa ilang mga representante nga nausab ang ilang hunahuna.

-o0o-

        Nagpada gyod og fax message si Dr. Jose Sal Tan, presidente sa CSCST, aron pagpasabot nga duna silay tambongan nga importanteng kalihokan sa eskuylahan nga di nila kalikayan.   Pipila ka tigpaminaw nipahibawo nako nga posibleng naapikhan silang Tan ug kaubanan kay naatol mang among sabot sa pagsugod sa intramural sa main campus.   Pero ang mga tinun-an nipahibawo nako nga wa pakita si Tan atol sa pagbukas sa kalihokan.  Gawas pa, nahibawo na silang daan sa intrams, nganong gipili man nilang Miyerkules nga maoy ilang iduaw sa Arangkada?

        Kasaligang mga tinubdan nibutyag nako nga silang Tan ug kaubanan gitambagan sa ilang mga abogado nga ang ilang pagtambong sa akong programa ug pagpanubag sa akong mga pangutana di makatabang sa ilang kawsa.   Maong nakahukom sila nga adto na lang manubag sa "proper forum," sa ato pa, sa Visayas Ombudsman ug sa ubang ahensiya nga nagsusi sa gipasangil nga anomaliya.

-o0o-

        Laing kasaligang tinubdan nipahibawo nako nga sukad niulbo ang kontrobersiya sa media, gihunong nang paghatag og honorarium sa mga nagtrabaho para sa evening program sa CSCST.   Wa hinuon siyay kasayuran kon nihunong na ba sab silang Tan ug ubang mga opisyal sa pagkolekta sa makabungog nilang mga honorarium.

        Hinaot nga nakumbinser na silang Tan ug kaubanan pagtuman sa Circular 2003-5 sa Department of Budget and Management.   Kay nagpapating ra ba sila sa pagpadayon pagpahimus sa makabuhong nga mga benepisyo bisan gi-disallow na sa Commission on Audit (COA) ang mga honorarium sa niaging katuigan.

-o0o-

        Laing makalipayng balita mao nga gipaagasan nag tubig sa administrasyon ang mga pansayan ug ubang batakang panginahanglan sa mga tinun-an.   Hinaot nga di ni ulog-ulog lang.

        Pero padayong nangugat silang Tan ug kaubanan nga legal ang mga honorarium ug ang DBM circular maoy kuwestiyonable.   Ilang katungod ang paghupot og sukwahing baruganan.  Pero mahimo bang samtang wa pa bakwia ang mga lagda mohunong una sila paghimo sa mga tinun-an sa CSCST nga ilang gatasan?   [30]  leo_lastimosa@abs-cbn.com