PAGPANLUGPIT
Usa niana ka higayon, kapid-an na ka tuig ang nilabay, dihay usa ka pangu sa usa ka gingharian nga gipasanginlang nanikas, nangawat ug namakak: Una siyang gipasanginlan nga nigamit sa kuwarta sa ilegal nga sugal pagtikas sa eleksiyon; dayon nitumaw ang misteryusong tape recording sa iyang pakig-istorya sa tagduma sa eleksiyon nga nag-detalye sa pagpaburot sa iyang boto ug pagkawat sa mandato sa katawhan.
Usa sa iyang mga torotot niangkon nga iya sa pangu ang tingog sa recording pero di tagduma sa eleksiyon ang iyang ka-istorya kon dili usa lang ka lider sa politika. Gipakita pa gani ang lider sa katawhan ug gipapirma og affidavit nga kasarangan rang tsika sa politika ang ilang gihimo sa pangu.
-o0o-
Pero ang pangu nipakita sa nasudnong telebisyon aron pag-angkon nga nakig-istorya siya sa usa sa mga tagduma sa eleksiyon. Niinsistir hinuon nga wa siya manikas kay igo lang gipanalipdan ang iyang mga boto. Dayon nangayo siyag pasaylo. Naglibog ang katawhan kay wa man siyay sayop nga giangkon.
Gidudahan sang kaligdong sa pangu. Ang iyang torotot nga nabistong namakak gipabilin sa puwesto. Samtang ang iyang lider sa politika wa na hisguti, morang nuog nga gisalibay sa suok kay di na man kapuslan.
Ang iyang sinaligang mga sakop sa gabinete nanganaog sa ilang puwesto ug giawhag ang pangu sa pagkanaog sab sa Palasyo. Ang dagkong lider sa politika, nga gipangulohan sa kanhi pangu nga nakapabanhaw sa demokrasya sa gingharian, ug negosyo, nga naglakip sa labing dagkog amot sa iyang kampanya, niawhag sab niya pagpahawa.
-o0o-
Human gitoohang nameligro nang mapalagpot sama sa iyang gisundang kurakot nga pangu, ang naapiking pangu nakaangkon og lig-ong mga alyado sa laing kanhi pangu, sa mga obispo sa simbahan, sa kinabag-an sa mga politiko ug kasundalohan sa gingharian.
Ang pangu nagdumili na pagtubag sa mga pasangil batok niya. Giawhag ang iyang mga kaatbang sa pagsang-at sa ilang mga reklamo sa bay balaoranan. Dihang nituman ang mga lider sa oposisyon, gigamit ang iyang alyadong mga magbabalaod pagluok sa kaso, bisan wa pay napresentar nga bisan usa ka saksi ug ebidensiya.
-o0o-
Aron pagsegurong di moulbo ang kasuko sa giilad niyang katawhan, gidid-an niyang mga protesta sa kadalanan, giawhag ang mga magbabalaod sa paghunong na sa tanang imbestigasyon sa mga pasangil batok niya ug gidid-an ang mga opisyal sa iyang pamunoan pagdawat sa mga imbitasyon ug pagpanubag sa mga pangutana sa bay balaoranan.
Kon nahibung mo ning akong sinuwatan, nag-praktis na kong daan unsaon paglusot ang umaabot nga mga pagpanlugpit sa katungod sa katawhan pagpakisusi ug pagsangyaw sa kamatuoran. Kon nakamay-ong mo ning mga panghitabo nga akong gihulagway, salamat. Wa pa diay hingpit mapitlok ang kaligdong, katarung ug maisugon nga pagpakabana. [30] leo_lastimosa@abs-cbn.com
No comments:
Post a Comment