Arangkada for September 30, 2005

 

     HUBOG SA GAHOM?

 

Bisan unsaon pag lalis sa oposisyon, ug bisan unsa pa ka-temporaryo, naklaro na untang kadaogan ni Pres. Arroyo:

• Malampusong giluba sa iyang alyadong mga kongresista ang impeachment complaints batok niya;
• Gibasura sa Korte Suprema ang pasiunang mga kaso nga nagkuwestiyon sa legalidad sa laktod nga pagluok sa impeachment process bisan wa pa kapresentar og mga saksi ug mga ebidensiya ang oposisyon;
• Napakyas ang iyang mga kaatbang, bisag naghiusa na silang kanhi presidente Corazon Aquino, Susan Roces, Sen. Panfilo Lacson ug militanteng mga grupo, pagkumbinser sa kinabag-an pagmartsa sa kadalanan;
• Pabiling nagsuporta niya ang kinabag-an sa kasundalohan bisan sa pangangkon nga andam nang moalsa ang batan-ong mga opisyal;
• Bisan sa bantang nga pagpamostura uban sa oposisyon, ang Estados Unidos padayong nagsuporta niya; ug
• Mora siyang gikoronahan sa United Nations sa iyang makasaysayanong pagduma sa wa-hinuoy-kapuslanang tigom sa UN Security Council.

-o0o-

Pero inay tagamtamon ang iyang kadaogan, nga nahimong mas tam-is tungod sa kaseryuso sa mga pasangil batok niya ug sa kagamhanan sa mga grupo ug mga personalidad nga nangampanya pagpalagpot niya sa Malakanyang, ug inay tinud-on ang panumpa nga bisan sa krisis dugangan pang iyang mga paningkamot pagpalambo sa nasud ug paghiusa sa katawhan, si Pres. Arroyo ra say nilukso pagbalik sa gahong nga bag-o lang niyang gikawasan.

Ambot tungod ba sa kahadlok nga padayon siyang apikihon sa iyang mga kaatbang, o tungod ba kay gikusi na sa iyang konsiyensiya, o tungod ba sa kabalaka nga di niya mahimong tabonan ang kamatuoran hangtod sa kahangtoran, si Pres. Arroyo ang nangunay paghatag og bag-ong kinabuhi sa kampanya pagpalayas niya gikan sa palasyo.

Maong wa pa gani mahuman ang eskandalusong pagpamayad sa higanteng mga utang sa iyang mga lider nga kakonsabo paglugos sa kaligdong sa nagkalainlaing institusyon, si Pres. Arroyo nag-umbaw ug nameligrong mahagbong sa mas lawom nga pangpang nga wa nay kahaw-asan.

-o0o-

Ambot tungod ba sa kahubog sa iyang kadaogan, o nakumbinser nga makuha ang bisan unsa niyang tinguhaon, o nahigam nga kay nagawongan man niyang House of Representatives, lokal nga mga opisyal, militar, kapolisan ug media, seguro sang mapahilom niya ang ubang sektor nga padayong nagsaba-saba ug pagsangyaw sa mga anomaliya nga gipasangil batok niya, way pupanaganang gisumpayan ni Pres. Arroyo ang taas na kaayong listahan sa iyang mga atraso:

• Gidid-an ang lehitimong mga protesta sa kadalanan;
• Nisud og kontratang gikahadlokang nibaligya sa nasudnong interes ngadto sa mga langyaw;
• Gidid-an ang mga opisyal sa militar, kapolisan ug sibilyan nga mga ahensiya sa pag-atubang sa mga imbestigasyon sa Kongreso nga way pagtugot gikan niya; ug
• Paghasi sa mga opisyal nga niatubang sa imbestigasyon sa mga senador nga wa mananghid niya. [30]  leo_lastimosa@abs-cbn.com