HIMATYON NA
Gawas lang kon maminaw ang mga kongresista sa ilang mga konsiyensiya, seguro nang mabasura ang impeachment complaint batok ni Presidente Gloria Macapagal-Arroyo karong semanaha. Kusi na lang sa konsiyensiya ang makaaghat sa mga kongresista pagpatigbabaw sa mas dako nilang obligasyon pagserbisyo sa kinabag-an sa katawhan inay sa presidente nga nagpabaga pagpabaha sa mga haylo ug mga hudlat aron lang pagpug-ok sa kahigayonan nga mahusay ug mahibaw-an ang kamatuoran sa seryusong mga pasangil batok niya.
Karong semanaha ang kataposang higayon sa mga politiko pagmatuod nga ligdong ang proseso nga ilang gipasiatab nga maoy angayng dangpan pagtubag sa lapad nga pagduda sa ka-lehitimo sa mandato nga nakuha ni Presidente Arroyo sa eleksiyon sa Mayo 10, 2004. Kon di matagbaw ang katawhan sa ilang makita, mahimong silay mangunay pagsusi sa kamatuoran ug pagsilot sa mga opisyal nga nigamit sa makinarya sa gobyerno pagtago sa kamatuoran gikan nila.
-o0o-
Ang mga torotot ni Presidente Arroyo, nga naglakip sa mga sakop sa media nga hangol nga nitukob sa minilyon ka pesos nga suburno nga gipabaha sa Malakanyang, nangugat nga angayng tahuron bisan unsay dangatan sa impeachment process kay igo lang gipatigbabaw sa mga kongresista ang balaod. Ang mga luog ra nga nagpuyo sa labing hilit nga mga langob maoy motoo sa ilang pagarpar.
Sa iyang ka-desperada nga magpabilin sa gahom, wa na magtagad si Presidente Arroyo pagtago sa iyang mga maniobra pagseguro nga di kaabot og 79 ang mga kongresista nga mopirma sa impeachment complaint. Nagpapating ang presidente sa pagpatawag sa mga kongresista sa Malakanyang, pagtawag nila sa telepono, pagtanyag nilag mga pabor, kuwarta ug proyekto ug pagtudlo sa ilang mga paryente sa importanteng mga puwesto sa gobyerno.
Labing uwahi niyang biktima mao si Kongresista Antonio Yapha sa ikaduhang distrito sa Sugbo. Kinsa iyang gipasaligan pinaagi sa telepono nga suportahan sa iyang away batok ni Gobernador Gwen Garcia. Nahadlok kong gipasaligan sab niyag suporta ang mga Garcia. Unsaon man niya pagtuman ang nagkasukwahi niyang mga saad kon maningil nang tanan niyang giulog-ulogan?
-o0o-
Di gawasnon ang mga kongresista nga nagtuki sa impeachment complaint tungod sa panuburno ug panghudlat sa Malakanyang. Sama nga di gawasnon ang mga botante nga iyang gilumsan sa binilyon ka pesos nga kuwarta sa gobyerno sa niaging eleksiyon. Mao nga kon, simbako, layo ra to, malupig sa kuwarta ang kamatuoran, si Arroyo di gihapon makatug nga maghayang.
Kay katawhan, lahi sa mga kongresista, di niya mahurot paghudlat ug pagbayad. Mopasuwabi ang ilang kauhaw sa kaligdong ug kamatuoran. Way makapugong kon magkahiusa na sila pagtingog ug paglihok. Ug di makapasalipod si Arroyo sa mga institusyon nga iyang giduhig sa nagkabulingit, nangalisbo ug naghingutas na niyang administrasyon—nga gibuhi na lang sa naghingapin niyang kahakog sa gahom. [30] leo_lastimosa@abs-cbn.com
No comments:
Post a Comment